Samoan Devotional

Open Heavens Samoa
  • 5.0 (5)
  • Christianity
  • Updated Daily

Lifestyle living. It is the Open Heavens devotional based on the Bible written by Pastor EA Adeboye and translated to the Samoan language.

  1. 2h ago

    Ao lei fanaua mai mauga (Before the mountains)

    OPEN HEAVENS MATALA LE LAGI MO LE  ASO TOFI 8 OKETOPA 2026 (tusia e Pastor EA Adeboye)   Manatu Autu: Ao lei fanaua mai mauga (Before the mountains)   Tauloto Tusi Paia: Salamo 90:2 “A o le‘i fānaua mai mauga, e le‘i faia fo‘i e oe le lalolagi ma le atu laulau, o le Atua oe mai le vavau e o‘o i le fa‘avavau.” Faitauga - Tusi Paia: Tanielu 3:14-30 E leai se gataaga o le mana o le Atua. Fai mai le Mareko 11:22-24, afai e te faatuatua, e mafai ona e faatonu se mauga, ona aveesea lea. Fai mai le tauloto mai le Tusi Paia o le asō, ae lei fanaua mai mauga, sa iai le Atua. O Lō tatou Atua e faavavau, ma e lē tau sailia lona malamalama. A iai lou faatuatua i Lē na iai ae lei fanaua mai mauga, e mafai ona ia liaieseina soo se mauga i lou olaga.  Peitai, e iai lava taimi e te faatonu atu le mauga i lou olaga, ae foliga e le alu ese. Aua foi e silafia e le Atua e mafai ona e aea le mauga ma manumalo. E le mafai ona tuua e le Atua se mauga i ou luma e le mafai ona e a’eina. A e faitau i le tusi o Iopu, e te iloa ai, ae lei taitai ona oo mai faafitauli ia Iopu, na silafia e le Atua e na te manumalo ai.  Le au pele e, e le faatagaina e le Atua oe e ui i se luitau e lē mafai ona e manumalo ai. Fai mai le 1 Korinito 10:13 “‘Ua lē maua ‘outou e se tofotofoga e ‘ese i lo tagata; a ‘ua fa‘amaoni le Atua, o lē na te lē tu‘uina atu ‘outou i le tofotofoga e sili i se mea ‘ua ‘outou lavātia, ‘ae sauni fo‘i fa‘atasi ma le tofotofoga se mea e sao ai, ‘ina ‘ia ‘outou lavā ‘o‘ono.” Afai e faataga e le Atua se mauga e tu i ou ala, o lona uiga o le a e ausia seisi vaega e maualuga atu o lona mamalu. Mo se faataitaiga, o tamaiti aoga e masani ona fai suega e fua iai le vasega e maualuga e siitia atu iai. I le faitauga mai le Tusi Paia o le asō, o tama Iutaia e toatolu na pasia la latou suega i le tetee lea e ifo i le faatusa auro, e ui na lamatia o latou ola i le lafoina i le afi, ona faaeaina lea o i latou e le Atua. O loo faamatala e le Iopu 42:12-16 le auala na faaeaina ai e le Atua Iopu i le maea ai o luitau. Ou te mautinoa na salamo le tiapolo ana iloa lava e na te lē osofaia Iopu aua o lona olaga ina ua maea le luitau, e sili atu le mamalu ma le manuia nai lo le tulaga muamua sa iai.  Atalii ma le afafine o le Atua, a faataga e le Atua oe e feagai ma se mauga, o lona uiga o loo ia naunau e te oo atu i leisi tulaga o lou olaga pe a maea ona e manumalo i le mauga. Tusa lava poo le a le tele poo le maualuga o le mauga o loo i ou luma i le asō, ole atu i le Atua e fesoasoani ia te oe e te aea ma e manumalo ai i le iuga. Ou te folafola atu e te manumalo i soo se mauga o loo tu i ou luma i le asō, i le suafa o Iesu. A faataga e le Atua se mauga e tu i lou ala, o lona uiga o loo ia silafia e mafai ona e aea ma manumalo ai, i le suafa o Iesu, Amene.

  2. 1d ago

    Ua e nofo sauni?4 (Will you be ready?4)

    OPEN HEAVENS MATALA LE LAGI MO LE  ASO LULU 7 OKETOPA 2026 (tusia e Pastor EA Adeboye)   Manatu Autu: Ua e nofo sauni?4 (Will you be ready?4)   Tauloto Tusi Paia: Efeso 4:26 “A ‘outou ita, ‘aua le agasala ai; ‘aua ne‘i goto le lā o ita pea ‘outou.” Faitauga - Tusi Paia: Roma 13:11-14, Kolose 3:5-8 E toe afio mai Iesu i soo se taimi. O le mafuaaga lea e ma te faia ma le mautinoa ai ma la’u ava le faaiuga,  ia aua lava nei iai se mea ma te feeseeseai ai ae ma te lei momoe, aua ma te lē mananao e tuua i maua iinei. Ou te lē manao i se mea e taofia i maua mai le faatasi ma le Alii pe a toe afio mai.  I le tauloto mai le Tusi Paia o le asō, o loo faamalosiau mai Paulo ia aua nei goto le la o tatou ita pea. Aua lava nei e alu e te moe ma le ita pei iai se mea e te lē fiafia ai i se tagata. Aua nei e faatagaina le ita e tupu ia te oe, aua e na te ono avea ma pā pupuni i le lua va ma le Atua. Fai mai le Efeso 4:31 ia outou tuu ese ‘upu fa‘afiufiu uma lava, ma le lotoa, ma le ita, ma le leo tele, ma le ‘upu fa‘aleaga, ‘atoa ma le loto leaga uma lava. Lafoai ese ma oe auā na te taofia oe mai le faatasi ma le Alii pe a toe afio mai.  Fanau a le Atua, tago e fofō vave soo se faafitauli i le lua va ma seisi tagata ina ia aua nei faalavelave i lou maua o le malo o le Atua pe a toe afio mai. Afai e faigofie ona e taofia le ita i se tagata, tamoe i le Atua mo se fesoasoani i le asō. Ole atu mo le alofa tunoa e te faamagalo ai iai latou ua faia se mea ua tigā ai lou loto, tusa pe lei fai mai e faamagalo latou. Aua e te faatagaina le loto tigā, ita poo seisi mea e tuueseese ai oe ma le Alii e faavavau.  I kerisiano faatuatua, o le oti e pei o loo moe aua o loo faatali mai le ola matagofie e faavavau (1 Tesalonia 4:13). Mo i latou o loo ola pea i le agasala, i tua atu o le oti, o loo faatali mai le faafanoga e faavavau (Eperu 9:27, Faaaliga 21:8). O le mafuaaga lea e tatau ai ona e ola e saunia e feiloai ma le Alii i soo se taimi. Fofo vave soo se faafitauli auā e te leiloa le taimi e amata ai ona e moe e faavavau.  E iai se tagata o le Atua na faapea mai o le aso Sa pe a maea le siitiaga, o nisi o lotu o le a tumu pea. O le a o atu faifeau e lauga, peitai o le taimi lea, o le lauga o le a lē pei ona masani ai. O le a faapea mai mai le pulelaa, ‘na ou iloa o le a tupu le siitiaga, ae ou te lei sauni, e lei saunia foi lenei ekalesia’. E latou te ono faatoese i le Ekalesia ua tuua i lalo nei, peitau ua lē toe aoga, ua tuai.  Le au pele e, a e misia le siitiaga, o le a lē aoga le taimi atoa na e lotu ai. Faamagalo i latou ua faatigā ia te oe, faagalo. Ou te tatalo ia foai atu e le Atua le malosi ma le loto toa ia te oe, e te foia ai soo se faafitauli e te ono misia ai le siitiaga, i le suafa o Iesu, Amene.

  3. 2d ago

    Ua e nofo sauni?3 (Will you be ready?3)

    OPEN HEAVENS MATALA LE LAGI MO LE  ASO LUA 6 OKETOPA 2026 (tusia e Pastor EA Adeboye)   Manatu Autu: Ua e nofo sauni?3 (Will you be ready?3)   Tauloto Tusi Paia: Luka 17:34 “Ou te fai atu ‘iā te ‘outou, o lea lava po, e i le moega e tasi, tagata e to‘alua; e ‘avea le tasi, ‘ae tu‘ua le tasi.” Faitauga - Tusi Paia: Mataio 24:4-14 I le tele o tausaga ua leva, na ou malaga ai i Amerika ma na ou nofo i se fale e fai potu moe, umukuka, potu malolo ma ona teuteuga uma. I se tasi po i le leva o le po, na ou ala ma ou iloa e lē o iai lau ava i totonu o le potu. Na ou faapea ua alu i le isi potu ina ia aua nei faalavelave i lau moe. Peitai ina ua maea sina taimi e lei sau lava, ona ou alu lea e sue i isi potu, ma ou iloa ai e leai seisi i isi potu. Ua luluina au ma ua ou faapea atu, ‘Le Atua e, o le a le mafuaaga ua ou misia ai? O le a le mafuaaga ua tuua ai au iinei?’ Faapea lava au ua alu le siitiaga, ma ua alu ai lau ava ao au ua tuua iinei. Sa matua luluina au seia oo ina faapea mai Agaga Paia, ‘e te lei sau ma aumai lau ava i lau malaga lenei’. O iina na ou toe manatua ai, e na o au na malaga mai. O lou ituaiga manatunatuga ma le mataala lea i le siitiaga. E sili atu le  nofo sauni i taimi uma i lo le faatamala ma tuua iinei pe a toe afio mai le Alii.  E pei ona ou faasoa atu i aso e lua ua mavae, o le taimi na ou faalogo ai i le toe afio faalua mai o le Alii o Iesu Keriso, o lau tatalo i po uma o lenei, ‘Le Alii e, a e toe afio mai ae lei aulia taeao, faamolemole aua e te tuua au iinei, i le suafa o Iesu’. Ou te tatalo a toe afio mai le Alii, e lē tuua oe iinei, i le suafa o Iesu. O le manatunatuga e ono le oo mai taeao, pe ono toe afio mai le Alii ae lei malama le taeao fou taeao o loo tapenaina lo’u tagata ia nofo sauni i le faasolo mai o le tele o tausaga. E leai seisi e iloa le ituaso poo le itupo e toe afio mai ai le Alii. O le mafuaaga lea e tatau ona e ola ai ma nofo sauni. E lē tatau ona e ola faatamala aua e te lē iloa le taimi e uma ai ou aso i le lalolagi nei pe toe afio mai ai le Alii. O loo faatusatusa ni auauna se toalua i le faitauga mai le Tusi Paia o le asō. O le tasi e faamaoni ma poto, ma na ola ma nofo sauni, e faia le finagalo o lona matai seia toe foi mai. O leisi sa faamatalaina e amioleaga aua ua ia manatu ifo i lona loto ma faapea, ua faatuai mai lona matai ma o lea, o le a faia soo se mea e manao ai o ia. Fai mai le Tusi Paia e mamafa ona faasalaga ina ua toe afio mai lona Alii.  Le au pele e, aua e te ola faatamala ona ua e manatu ua faatuai ona toe afio mai le Alii. Ua lata lona toe afio mai. Amuia i latou o ola ma  nofo sauni mo lona toe afio mai. O e ola ma nofo sauni mo le toe afio mai o le Alii? I le suafa o Iesu, Amene.

  4. 3d ago

    Ua e nofo sauni?2 (Will you be ready?2)

    OPEN HEAVENS MATALA LE LAGI MO LE  ASO GAFUA 5 OKETOPA 2026 (tusia e Pastor EA Adeboye)   Manatu Autu: Ua e nofo sauni?2 (Will you be ready?2)   Tauloto Tusi Paia: Luka 12:40 “O lenei, ‘ia ‘outou nofo sauni; auā o le itū aso tou te lē mānatunatu ai, e sau ai le Atali‘i o le tagata.” Faitauga - Tusi Paia: Mataio 24:4-14 E faatusa e Iesu lona toe afio mai i le taimi na faaumatia ai e le Atua le lalolagi i le lolo (Kenese 7:11-23) ma le taimi na ia faaumatia ai Sotoma ma Komoro i le afi ( Kenese 19:24-25). E pei lava o taimi o Noa ma Lota ao aai tagata ma feinu, faaipoipo, fausia, toto, faatau mai ma faatau atu, e faapena foi le aso e toe afio mai ai le Alii (Luka 17:26-30). O le a faasolo pea le olaga seia oo i le aso e afio mai ai le Alii e taofia ma suia mea uma. E te manatu i se kerisiano faatuatua ua pau atu i faaosoosoga i ni nai sekone ae taunuu loa le siitiaga. O lea tagata ua ia filifili e lē mafuta faatasi ma le Alii e faavavau. Ou te tatalo ia e mataala ma sauni e te maua le lagi pe a toe afio mai le Alii, i le suafa o Iesu.  O ananafi, na ou talanoa atu ai i vaega taua e tolu i le toe afio mai o le Alii. O le asō, o le a ou talanoa atu i le vaega mulimuli.  E faateia ē e lei sauni- Fai mai le 2 Peteru 3:10 e sau le Alii e pei o se gaoi i le po. E taua le iloa e lē faateia uma tagata i gaoi. Fai mai le Mataio 24:43 ana iloa e le matai o le ‘āiga po‘o le fea le itū po e sau ai le gaoi, po ‘ua na leoleoina, ‘ae lē tu‘ua e ia lona fale ‘ia ‘elia. Ia e mataala ma nofo sauni i nei e misia le siitiaga. E le faia faalilolilo-e iloa ma vaai atu uma tagata i le toe afio mai o le Alii, pe agasala pe faaolaina. Fai mai le Mataio 24:27 e pei o le emo o le uila i sasa‘e ma malamalama atu i sisifo; e fa‘apea fo‘i ‘ona sau o le Atali‘i o le tagata. A emo le uila, e iloa uma atu lava e tagata. E faapena foi le toe afio mai o le Alii, e lē o se mea lilo, e iloa atu e mata o tagata uma faatasi ma i latou o loo siitia faapea ma ē o le a tuua. O le mealilo a i latou o loo faafoliga o se fanau a le Atua o le a faaalia i lea aso. E afio mai Iesu mo le faatoanofotane e mamā ma leai se ponā - o loo faamatala e le Efeso 5:22-33 o le Ekalesia o le faatoanotane a Keriso. O le Ekalesia e faasino i tagata kerisiano, e lē o falesā, ma e tatau ona e malamalama poo le a lava mea e tatau ona faia e le Ekalesia, e aofia ai ma oe. A toe afio mai Iesu, e na o i latou e mamā o latou ofu e ō atu ma ia. O ofu o loo faasino i lou olaga. E na o i latou e faataga le Alii e faamamā ma faapaia i latou e agavaa e avea ma ana faatoanofotane i lea aso (Efeso 5:26-27). Le au pele e, e te aofia ai ma i latou? Tatalo Le Alii e, faamolemole fesoasoani mai ia te a’u ina ia ou faamamaina ma faapaiaina seia e toe afio mai, i le suafa o Iesu, amene.

  5. 3d ago

    Ua e nofo sauni?1(Will you be ready?1)

    OPEN HEAVENS MATALA LE LAGI MO LE  ASO SA 4 OKETOPA 2026 (tusia e Pastor EA Adeboye)   Manatu Autu: Ua e nofo sauni?1(Will you be ready?1)   Tauloto Tusi Paia: Galuega 1:11“Ua la fai mai, “O ‘outou tagata Kalilaia e, se a le mea tou te tutū ai, ma va‘ava‘ai i le lagi? O Iesu lenā, ‘ua ‘aveina a‘e nai ‘iā te ‘outou i le lagi, e fa‘apea ‘ona toe afio mai o ia, e pei o lona afio atu i le lagi ‘ua ‘outou va‘ava‘ai i ai.” Faitauga - Tusi Paia: 2 Peteru 3:3-14 O se tasi o mafuaaga na ou suesue ai i le olaga o Elia mo le tolu tausaga ona na aveina ola o ia i le lagi e aunoa ma le tofo i le oti. Ana faapea e tuu i sau filifiliga, ou te le manao ou te oti ae ia aveolaina a’u i le siitiaga, (1 Tesalonia 4:16-17). I le taimi na ou iloa ai le siitiaga, o lau tatalo i po uma ae ou te lei moe o lenei, ‘Le alii e, a e toe afio mai ae lei oo taeao, faamolemole aua e te tuua ai iinei’.  O le manatu e ono lē aulia taeao, pe ono afio mai le Alii ae lei ao, ou te mataala ai pea talu ona ou faaolaina ma talia Iesu i lou ola. E ono afio mai o ia i le po nei. O loo tusia manino i le Luka 17:34, e ono momoe faatasi tagata e toalua, e toatasi e alu i le siitiaga ao leisi e tuua iinei. A toe afio mai Iesu nanei, e te ono iai faatasi ma ia i lona mamalu pe tuua oe i lalo nei? O le asō, ou le a ou talanoa atu i vaega e tolu o vaega e ono e tatau ona e iloa ma silafia e faatatau i le toe afio faalua mai o le Alii. O isi vaega o totoe e faamatala atu taeao.  E lua vaega e faavasega mai ai -Muamua o le siitiaga, pe a afio mai Iesu i luga o ao ma siitia kerisiano faatuatua uma o ē ua maliliu ma e o soifua i lea taimi (1 Tesalonia 4:16-17). O le vaega lona lua o lona toe afio faalua mai, ma e iloa atu o ia e mata o tagata uma lava( Faaaliga 1:7, 19:11-16).E taunuu  - Tusa pe foliga mai ua faatuai, ua lata ona toe afio mai Iesu. Aua e te amanaiaina tagata e tautatala ma ola e pei e lē toe afio mai o ia. O loo talanoa mai ai Peteru i le faitauga mai le Tusi Paia o le asō, o le a latou tulai mai i aso mulimuli ma lui lenei mea moni. O le faanoanoaga, e tele faifeau, e lē lauga i le toe afio faalua mai o Iesu mo le tele o tausaga. Le au pele e, aua e te faatamala, ia e manatua pea ua lata ona toe afio mai Iesu e sili atu i ou manatunatuga. Ou te iloa e pei e foliga mai ua faatuai, peitai o le fua o le taimi a le Atua e ese mai manatu o le tagata, e pei ona faamatala i le faitauga mai le Tusi Paia o le asō.E mautinoa - O le toe afio mai o Iesu ua tumau ma e leai se mea e faia e se tagata e suia ai. O loo faamatala e le faituaga mai le Tusi Paia iai tatou, e lē o faatuai le toe afio mai o le Alii e tusa ma lana folafolaga.  A ia folafola e toe afio mai, e mautinoa e taunuu ( Galuega 1:10-11) I le Mataio 24:4-51, na auina mai e Iesu le mau faailoga eseese o lona toe afio mai ma o se tasi o faailoga taua, o le toatele o le au taufaasese ma mea pepelo ma o le a toatele tagata o le a faaseseina ai. Ou te tatalo ia aua lava nei faasesēina oe i soo se auala, i le suafa o Iesu, Amene.

  6. 5d ago

    Aua nei faama’a’a lou loto (Dont harden your heart)

    OPEN HEAVENS MATALA LE LAGI MO LE  ASO TOONAI 3 OKETOPA 2026 (tusia e Pastor EA Adeboye)   Manatu Autu: Aua nei faama’a’a lou loto (Dont harden your heart)   Tauloto Tusi Paia: Faataoto 28:14 “Amu‘ia le tagata ‘ua lē aunoa ‘ona mata‘u o ia; a o lē ‘ua fa‘ama‘a‘a lona loto, e pa‘ū o ia i le leaga.” Faitauga - Tusi Paia: Salamo 95:8-11 E mata’utia tele a’afiaga pe a fa’ama’a’a le loto o se tasi i le upu a le Atua. I le Fa’aaliga 2:7; fai mai le Tusi Paia, “O le ua i ai taliga inā faalogologo mai ia o ia i le mea ua fetalai mai ai le Agaga i ekalesia.” I le lalolagi i le taimi nei, e toatele tagata ua lē fia faalogo i le upu a le Atua, aemaise pe a ta’u atu ai lo latou sesē. Latou te tauemu ma tuulafoai i tagata moni o le Atua ma inoino i poloaiga a le Atua. E masani ona maua i latou i ekalesia e lē faasalaina ai le agasala, ma e lē aoaoina ai le amioatua. Ua ta’u mai e le Tusi Paia ia i tatou o tagata faapea o lo o lamatia i le fa’afanoga e faavavau pe a le fia usitai i le upu a le Atua (2 Tesalonia 2:10-12).  O le toatele o tagata ua o latou faaigoa i latou lava o kerisiano ua ‘oto lava na o vaega mai le upu a le Atua e fiafia i ai ma fetaui ma a latou mea o fai. Peita’i ua o latou lē iloa e lē mafai ona o latou malamalama ma lagona le atoatoaga o le Atua pe a filifili tau lava o mea e fia faalogo i ai. O le mea moni o le tele o taimi, o le upu e tatā’ia i tatou i faamanuiaga a le Atua o mea ia ua tatou lē fia faalogo ma ola ai. O le māasiasi ma le satauro na faatulagaina Iesu mo le mamalu (Eperu 12:2). E faapenā fo’i le mataupu a Iosefa, o le lua ma le falepuipui na tapenaina ia mo le maota o le tupu.  Ua faamatala mai e le tusi o Eperu 4:12 ia i tatou o le upu a le Atua “o lo‘o matuā galue fo‘i, o lo‘o sili fo‘i lona ma‘ai i pelu uma e fa‘atau ma‘ai itū, o lo‘o vaevae fo‘i e o‘o lava i le vavae‘eseina o le loto ma le agaga, o gaugātino fo‘i ma ‘a‘ano o ivi..” O le Afioga Paia a le Atua e faamaonia ai a tatou agasala e ta’ita’iina ai i tatou i le salamō ae lē o le faasala. Soose taimi e faalogo ai se uso i le upu a le Atua ma tuia ai lona loto, e lē tatau i lea tagata ona lē malie ae avea o se avanoa e aoaoina ai ma liliu ese ai mai le leaga i le lelei. Fai mai le  Galuega 2:37-38; “Ua fa‘alogo mai i latou, ‘ona tuia lea o latou loto, ‘ua latou fai mai ‘iā Peteru ma le ‘au ‘aposetolo uma, “Sema e, le ‘au uso e, se a se mea matou te faia?” ‘Ona fai atu lea o Peteru ‘iā te i latou, “‘Inā salamō ia, ma ‘ia ta‘itasi ma papatisoina ‘outou uma i le suafa o Iesu Keriso, mo le fa‘amāgaloina o agasala; ‘ona maua lea o ‘outou o le mea foa‘i fua mai, o le Agaga Pa‘ia lea.” Ua talatala mai e le upu mai le Tusi Paia ua tusia i luga, na lauga e Peteru le talalelei a Iesu Keriso i nisi o tagata i Ierusalema ma na tuia o latou loto. Mulimuliane ina ua liua o latou loto, ua faaolaina ma ua papatisoina (Galuega 2;41). Le au pele e, a ua e lagona le upu a le Atua aua ne’i fa’ama’a’a lou loto. Faataga lana Afioga Paia e pa’i, fa’asa’o ma faatonu ia te oe ina ia fa’amamāina atoatoa oe i galuega lelei uma (2 Timoteo 3:16-17). O i latou e fa’ama’a’a o latou loto i le upu a le Atua e i’u i lona toasa, i le suafa o Iesu, Amene.

  7. 6d ago

    Tumau i le loto faafetai (Remain grateful)

    OPEN HEAVENS MATALA LE LAGI MO LE  ASO FARAILE 2 OKETOPA 2026 (tusia e Pastor EA Adeboye)   Manatu Autu: Tumau i le loto faafetai (Remain grateful)   Tauloto Tusi Paia: Salamo 26:7 “Ina ‘ia lagona atu le leo o le vi‘iga, ma ‘ia ta‘uta‘u atu ou vāvega uma lava.” Faitauga - Tusi Paia: Salamo 103:1-5 I se vaitau ua leva atu, na ou alu i le fale o se tamaloa e faatino ai se polokalame. Sa faia i le po ma ina ua maea, na fai mai matou te momoe ona ua leva le po. Na ou talia, ma i le taeao, na fai mai sei fai le ti o le taeao ou alu ai lea. Ina ua ma nonofo e fai le ti, na sau i totonu le kuka e fesili i le tamaloa e ona le fale poo le a le meaai e fia tausami ai. Ina ua maea se taimi o filifili le meaai e ai, na ia filifili i le falaoa ma fuamoa. Na toe alu seisi taimi o filifili poo le a le kukaina o fuamoa, se saka, falai, palu ma isi, na iu ina filifili e saka. Ona toe fai foi lea o seisi faatalatalanoaga poo le a le vela e saka ai, pe laitiiti le vela, feoloolo pe vela atoatoa. E uma ane ua atoa le 25 minute ma ua ou lagona le matua fiaai. Ona liliu mai lea ia te au ma fai foi le fesili e tasi poo le a le meaai ou te fiaai. Na ou fai iai e aumai soo se meaai. Ona fai mai lea o loo iai le falaoa ma fuamoa. Na ou fai atu lea ua lelei mo au. Ua toe fesili mai i le kukaina ou te manao ae ou tali, e talia soo se faiga ae ia lava ma totoe e tali ai lou fiaai. Ina ua maea na ou faapena ifo ia te au lava, tusa lava pe leai sau tupe, ae o le measili, o loo faigofie pea ona ou ai. Fanau a le Atua, tusa pe e te le maua mea uma o loo e naunau iai i lenei olaga, e tatau lava ona e faafetai i le Atua i mea uma ua e maua.  Fai mai le Failauga 6:9 “E sili ‘ona lelei o le mea ‘ua maua mai, i le mea ‘ua mana‘o i ai le loto;“. E toatele tagata e leai se loto faafetai i mea ua latou maua aua o loo alu le taimi o talanoa ma manatunatu i mea o mananao ai. E lē loto faafetai i mea o loo latou vaai atu iai ona o manaonaoga fesuisuiai. Le au pele e, afai ua foai atu e le Atua ia te oe le meaalofa o le ola, faafetai atu ia te ia. Fai mai le Failauga 9:4, Auā o lē ‘ua fa‘atasi i ē ‘ua ola uma, ‘ua ‘iā te ia le fa‘amoemoe, aua e sili se ulī ola i lo le leona mate. Afai lava o loo e soifua, e iai lava le faamoemoe e te ausia le mea o loo e naunau iai. Aua le soona naunau i mea o loo e fia maua, aua e galo ai ona e faafetai i le Atua mo mea uma ua ia faia. I mea uma lava, avatu lau faafetai. E te loto faafetai ea i mea ua e maua? I le suafa o Iesu, Amene.

  8. Sep 30

    Tatalo mo lou atunuu (Prayers for your nation)

    OPEN HEAVENS MATALA LE LAGI MO LE  ASO TOFI 1 OKETOPA 2026 (tusia e Pastor EA Adeboye)   Manatu Autu: Tatalo mo lou atunuu (Prayers for your nation)   Tauloto Tusi Paia: Teuteronome 32:43 “Outou nu‘u ‘ese e, ‘inā ‘oli‘oli ia fa‘atasi ma lona nu‘u; auā na te taui ma sui le toto o ana ‘au‘auna, na te tu‘uina atu fo‘i le taui i ē o fai o ia ma fili; e togiolaina fo‘i e ia le lau‘ele‘ele o lona nu‘u.” Faitauga - Tusi Paia: Salamo 80:1-7 Tatalo Tamā, ou te faafetai ia te oe mo lou atunuu o Samoa. Faafetai i lou aao malosi ma le mana o loo e tausia ma faatupuina ai pea mai le tele o tausaga. Tamā, faamolemole ia iai lou alofa mutimutivale i luga o si o matou atunuu. Ia avea lou alofa mutimutivale e sautualasi e faasaoina i matou mai le amioleaga, i le suafa o Iesu. Tamā, faamolemole ia e tofia alii ma tamaitai amio Atua i tulaga taitai. Faamolemole le Alii e, ia faia pea lou finagalo i lenei atunuu, i le suafa o Iesu. Tamā, faamolemole faataga lou poto e taitaiina loto o matou taitai ma i latou o loo iai tulaga pule. Foai atu le alofa tunoa e taitai ai i matou ma le amiotonu, i le suafa o Iesu. Le Alii e, faamolemole ia e saisaitia  loto o tagata amioleaga i lo matou atunuu. Ia latou iloa lou filemu seia latou liliu ese mai amiolega uma ma ia lafoai o latou ola ia te oe, i le suafa o Iesu. Tamā, faamolemole faataga soo se vaega o le tamaoaiga o lo matou atunuu ia tuputupu pea ma manuia. Faataga le manava o Lou filemu ma le alofa tunoa e agi i soo se vaega o atinae, i le suafa o Iesu. Tamā, faamolemole faataga faaperofetaga lelei ma manuia ua faia i lou atunuu ia faataunuuina. Faamolemole ia faamautuina lau upu e tusa ma lo matou atunuu, i le suafa o Iesu. Tamā, faamolemole faataga lou malamalama e susulu atu i totonu o lou atunuu. Ia faamutaina soo se agaga o le fememeai ma le tumau i le mea e tasi, ae faataga lou malamalama e aumaia le faamautuina ma le alualu pea i luma i le suafa o Iesu. Tamā, faamolemole ia iai lou filemu i lo’u atunuu. Aveese, le femisaai, faailoga lanu ma soo se galuega a le pouliuli e faatupuina le feitagai i le va o tagata, i le suafa o Iesu. Tamā, faamolemole ia faamalosi ma taitai a matou tupulaga talavou. Faataga matou talavou e tulai mai ma faatulaga lelei i latou i tulaga i soo se vaega o le tamaoaiga. Aua nei seetia i latou i tuinanau o talavou, i le suafa o Iesu. Tamā, ia faaumatia soo se fuafuaga a le tiapolo e pau atu ai lou atunuu i le faanoanoaga. Ia faatumuina le laueleele i lou olioli ma ia faauluolaina i matou i vaega uma, i le suafa o Iesu. Tamā, ia e faamanuia ia Samoa ia tumau pea i lona faavae mautu, e faavae ia te oe le Atua le Tamā, le Alo  ma le Agaga Paia, i le suafa o Iesu, Amene.

See All (1.6K)

Ratings & Reviews

5
out of 5
5 Ratings

About

Lifestyle living. It is the Open Heavens devotional based on the Bible written by Pastor EA Adeboye and translated to the Samoan language.

Information

  • Creator
    Open Heavens Samoa
  • Years Active
    2022 - 2026
  • Episodes
    1.6K
  • Rating
    Clean
  • Copyright
    © 2026 Samoan Devotional
  • Show Website
    Samoan Devotional