究講

9gong

0.0 (0)
Books
Updated Daily

「隨心地究講，講究地生存。」江玖(阿玖)：個性主義文7青，讀者自療死sell屎，唔識游水盧亭人，深度中毒獨讀者。

11/04/2022

究讀：白洗嬉《雖然想死，但還是想吃辣炒年糕》20211118

唔知有幾多人覺得自己係介乎正常同抑鬱之間？我覺得香港應該係幾多嘅，而我應該係其中一個。有時候都幾矛盾，兩種性格同情緒可以同時存在：正面同負面、外向同內向、自信同自卑，有時都唔知邊一面係真正嘅自己。呢排睇得多名家作品同心理書，會令自己覺得「應該好似佢地咁」、「我都可以做到」嘅感覺，但時間證明現實嘅殘酷，將幻想慢慢破壞。本來想睇下本書幫唔幫到朋友，但睇嘅途中發現，可能自己先需要睇，因為佢將我從正能量嘅夢境，拉返入真實嘅日常。作者係一個有輕微抑鬱症嘅女仔，而書嘅內容就係佢接受12個禮拜心理治療嘅經歷，主要係佢同醫生嘅對話。入面冇詳細描述治療過程，冇激勵人心嘅勵志道理，冇積極走出人生低谷嘅康復故事。作者嘅心理狀況反反復復，甚至到故事完結時仲係唔穩定，但咁樣反而顯得出故事嘅真實：要改善情緒問題，絕對唔係一朝一夕、簡簡單單就可以完成嘅事情。作者面對情緒時跌跌撞撞嘅經歷，為我加添左一層親切感。喺同醫生嘅對話入面，作者詳細描述生活上大大小小嘅事，從家庭、交友、工作、感情上嘅都有，並嘗試表達箇中嘅感受。喜、怒、哀、樂，種種情感，佢都嘗試用言語去表達，時而比喻、時而描寫，雖然作者未必表達得好清楚，思路同情緒有時會混亂，但好欣賞佢努力講出來嘅勇氣，而上一本書都有提到，將感受寫出來亦不失為一個抒解情緒嘅方法，亦可以趁機會整理自己嘅思緒。我都係去到近期開始寫文，先感受到佢嘅神奇效果。作者發現自己嘅情緒問題，主要係源於自卑感。因為要迎合他人同社會，導致心理上經常處於矛盾同掙扎。自卑嘅原因有好多，無論係由於自細家庭環境嘅影響，同事之間嘅比較，或者韓國社會對女性嘅刻版印象，都會令佢為自己設下一個理想嘅形象，偽裝成佢認為大家會中意嘅性格。當佢認為自己做唔到佢理想嘅形象，或者得唔到認同，佢就會好自卑；但即使其他人欣賞佢、親近佢，佢亦會因為覺得自己並唔係佢地想像中咁好，認為自己冇資格被愛，而感到羞愧同有壓力。呢種對自己過於苛求，長期唔可以做自己嘅煎熬，導致佢情緒容易受影響，反復嘅心情令佢非常痛苦。我之所以對佢嘅遭遇有所共鳴，係因為包括我在內，城市人嘅生活長期處於他人嘅目光之下，令人不經意地迎合家庭、職場、社會放喺你身上嘅形象同價值觀。唔係個個人性格都係樂觀同外向，踏入社會係一個漫長嘅學習過程，跌跌撞撞總會發生，亦會有疲累同挫敗嘅時候。有時人為左適應社會，會刻意迴避自己性格嘅某一面（無論係好嘅定係壞嘅），戴上假面具做人，呢種表面同內心嘅矛盾同落差往往就係令人感到辛苦嘅地方。作者將自己嘅感受赤裸裸咁表達出來，令我感到格外真實，雖然我並冇喺書中領略到咩大道理，身處嘅環境亦有啲唔同，但作者成功地透過文字同我呢個讀者嘅感受連結埋一齊了。故事到最後，作者仍然面對緊自己嘅情緒問題，就同好多受到情緒問題困擾嘅香港人一樣，喺高壓嘅環境下努力生存緊。或者我地都應該好似作者咁樣，好好咁擁抱自己嘅情緒，因為即使係負面嘅情緒都好，都係自我嘅一部份。

7 min
11/02/2022

究讀：西多昌規《不被情緒左右的28個練習》20211115

2020年係我情緒最低落、最唔穩定嘅一年。工作同生活諸多不順，身邊發生嘅好似都係壞事，長期鮑受失眠困擾，亂諗野嘅時間更多，令到自己更加唔開心。記得要直到年尾，疫情穩定啲，生活正常返少少，加上開始睇書（呢樣好緊要），情緒先有改善；有日喺獨立書店見到個情緒專題書枱，睇中左呢本書，發現有啲方法都幫到我，所以希望同大家分享下。作者西多昌規係精神科醫生兼大學講師，曾經醫過唔少受情緒嚴重影響嘅患者。佢首先分析容易受情緒影響嘅人有咩特質，再用神經科學解釋情緒受影響嘅原因，之後再講點樣令自己冇咁易受情緒影響。作者用唔同嘅角度，例如心理學、神經科學、生理學去講情緒，內容淺白，容易理解，書中嘅方法亦唔難跟隨。你可能覺得，坊間心理書咁多，來來去去都係講嗰啲「老生常談」，再睇呢本書有咩意義呢？表面上可能係咁，但作者所講嘅係根據佢嘅臨床經驗同研究數據，例如瞓覺可以緩和情緒，運動對心理嘅益處；書中有一啲講法亦打破左一般人對情緒嘅認知：例如情緒化同性別嘅關係唔大，除左先天遺傳精神疾病，受基因嘅影響亦有限。書中舉出多個建議幫助讀者減低情緒嘅影響，有幾個我係印象特別深刻嘅：第一，「接受」自己嘅負面情緒同狀態，例如失眠，唔好為瞓唔著而緊張煩惱，甚至迫自己瞓，否則會有反效果；第二，有情緒問題唔好怕同人講，搵到信任嘅人講自己嘅煩惱，對我來講係好有幫助，即使嗰刻冇傾訴對象，都可以將情緒寫出來（好似我呢家咁）；仲有啲觀點同《被討厭的勇氣》係相輔相乘嘅，例如為自己而生活、做好「課題分離」，唔好受過去束縛等，接受自己嘅不完美，同時認清同自己無關嘅所謂「影響」。每個人煩惱都唔一樣，受情緒困擾嘅原因都唔同，書中嘅方法未必全部啱用，但總可能有啲建議，可能會幫助到讀者面對情緒。根據調查，2020年近六成香港人精神健康「不合格」，情況比2019年更差。環境未必能夠控制，出現負面情緒係好正常，我地應該逃避同否定佢，定係面對同接受佢呢？

7 min
10/31/2022

究讀：岸見一郎《被討厭的勇氣》20211108

我大概由上大學開始，就開始煩惱自己嘅人生。大學嘅環境比中學複雜得多，我開始發現我唔可以淨係做自己，開始在意人哋點樣睇我，喺人際關係同學業上都有啲挫折。踏入社會之後，遇到嘅挑戰越來越多、越來越大，工作上複雜嘅人事令我透唔到氣，事業上嘅跌跌撞撞令我覺得，自己係咪注定唔會成功。我花咗若干年嘅時間，先開始識得調整自己嘅心態，但到左今日，人際關係嘅問題、環境嘅動盪同挑戰，有時都會令我感到徬徨，我哋係咪真係咁無力，好多嘢都改變唔到呢？岸見一郎嘅《被討厭的勇氣》，未必可以解決到你身邊嘅問題，但佢提供一個面對問題嘅方法，幫助解決你心裏面嘅煩惱。佢利用希臘哲學同阿德勒心理學，建立左一套獨特嘅人生觀，書中有啲論點係我從來冇想像到嘅，雖然未必完全認同，但的確提供左另外一個角度去面對人生。好多人會認為，呢個世界係由因果連結而成，弗洛伊德指出過去嘅經驗會塑造我哋嘅人格，從而決定我哋嘅未來。但阿德勒就反其道而行，唔係經驗決定自我，係我哋嘅諗法決定點樣睇過往嘅經驗。經驗再唔係客觀嘅事實，只係我哋主觀嘅解釋，所以經驗係好係壞，對我哋嘅影響正面定負面，完全係由我哋自己去決定。例如有人會覺得自己生於破碎嘅家庭，所以佢嘅人生係不幸嘅，但其實佢係利用緊過去來支持佢認為自己係不幸嘅觀點，事實上佢嘅過去同佢而家嘅感受係冇直接關係。此外，好多人認為自己冇將來，唔會成功，好多時係先有呢種諗法，再從過去或者自己當中搵原因，例如自己有劣根性、壞習慣，或者歸咎於自己嘅出身、身處嘅社會等等。只要你明白過去嘅經驗並唔係絕對，我哋就可以自由咁詮釋過去帶俾我哋嘅意義，發掘佢積極嘅一面，並為未來保留更多嘅可能性。作者稱之為「接納自我」：接受自己嘅過去，分辨出可以改變同唔可以改變嘅事，將心機放喺可以改變嘅事度，就可以創造自己嘅未來。書中另外一個重點，就係「所有的煩惱都是人際關係的煩惱。」人係群居嘅動物，生活離唔開其他人，但當我地一旦將目光轉移至「人哋點諗」嘅時候，就會為自己製造煩惱，因為一旦在意他人嘅目光，就變成「為他人而活」，唔係過緊屬於自己嘅人生。如果你習慣咗諗人哋點睇你，你都會好容易將自己對其他人嘅諗法投射喺佢嘅身上，例如你作為父母，認為仔女應該努力讀書聽話，事實上依樣只係你對佢嘅期望，而唔係佢嘅睇法。當你嘅期望同佢實質上嘅行為有落差，你就會感到好唔高興，因為佢辜負左你。此外由於你太注重別人嘅目光，會變得很容易同人比較、將身邊嘅人視為你嘅競爭對手，你同他人就建立唔到信任。事實上，你嘅意義並唔係由他人賦予嘅，其他人其實並唔係咁在意你嘅價值，你其實係同一個理想中嘅自己比較，而唔係其他人。只要你唔再在意所謂他人嘅目光，你就能夠開始過屬於自己嘅人生；只要你唔再將自己同他人比較，就會明白其他人同你只係「唔同」，而唔係「敵對」，真正嘅人際關係，係可以自由盡情地展現自我嘅關係。咁點樣先至可以建立良好嘅人際關係呢？作者就提出左「課題分離」，分辨出邊啲係你需要關心，邊啲係他人所關心嘅。例如人哋批評你，冇考慮你嘅感受，呢樣係人哋嘅課題，何必要為人哋嘅諗法而唔開心呢？同時你亦唔需要因為身邊嘅人所做嘅嘢感到失望同憤怒，因為佢點樣做係佢嘅課題，我哋唔應該干涉，亦唔需要為佢哋唔高興。「課題分離」並唔係提倡自私，而係尊重雙方嘅自主，建立一種互相接納，而唔係互相要求嘅關係。大家唔會評價自己同對方，但會為自己同他人嘅付出表示感謝，覺會突顯自己同他人嘅價值。所以我地要做嘅就係「信任他人」，既然對方點做係對方嘅課題，我地就無必要多加質疑，做好自己就可以了。即使知道人生係自主嘅，同他人亦都做到「課題分離」，但人同人之間嘅關係應該係點呢？人生嘅意義係咩呢？作者就提出「社會意識」呢個概念。每個人都歸屬於一個共同體裡面，共同體建構自我同他人、他人同他人之間嘅連結，大家都係共同體嘅一份子，縱使每個人都唔同，但冇高低之分。對自己來講，自我係獨特嘅；係共同體來講，我地係「平凡」嘅。所以唔好自以為「特別」而想得到認同。我地要做嘅，就係為共同體作出貢獻，而呢種貢獻並唔係為左得到某人認同而做（否則就會跌入「為他人而活」嘅苦惱中），而係彰顯自我嘅價值。而個人嘅價值，唔喺過去，唔喺將來，而就喺「當下」，所以我地要諗嘅，就係呢家應該做咩，點樣先喺當下活得有價值。依作者所講，就係做到「接納」、「信任」同「貢獻」。書中對我最大嘅啟發，就係令我重新認識自己嘅經驗，唔會受過去束縛；我亦都學識真正嘅人際關係並唔係互相爭奪認同感，而要做好課題分離，信任他人。荀子話：「古之學者為己，今之學者為人。」人生嘅價值並唔係人地賜予嘅，亦唔係由外在環境決定：價值係由自己去創造。唔知你睇完本書之後，會唔會對你嘅人生，都會有啲新嘅體會呢？

10 min
10/27/2022

究讀：馮友蘭《我的人生觀》20211102

繼《人生種種》、《哲學的陌生感》之後，不如返到去上世紀三、四十年代嘅民國，睇下當時嘅知識份子點睇人生。三十年代係一個思潮激蕩嘅年代，各種思想同主義互相角力，如民主主義、自由主義、馬克思主義、新儒家等…由身處不穩定嘅政局，到面對國破家亡嘅危機，知識份子如何透過反思人生，安身立命？馮友蘭係民初最重要嘅思想家之一，佢寫嘅《中國哲學簡史》曾經係外國學者了解中國哲學嘅必讀書，對華人學術界（特別喺中國大陸）影響深遠。作為新一代儒者，馮友蘭透過融薈中西嘅哲學，發展出一套獨特嘅人生觀。古代士人嘅人生目標有三個層次：立言、立功、立德。放喺現代來講就係知識、事業同德行。馮友蘭認為，三種目標分別受　「才、命、力」影響：每個人都有唔同嘅天賦（才），所以精通嘅知識會唔一樣；要事業有成當然要靠能力同努力，但亦受到外在條件限制（命）；唯獨德行方面，無論你能力點、環境係點，都可以靠努力（力）去實賤。由於「德」喺三種目標入面係最重要嘅，馮友蘭認為即使覺得自己唔夠才華，或者外在環境可能不利於發揮自己所長，但只要努力做一個有德行嘅人，人生就已經充滿意義。民初政局動蕩，知識份子點樣喺權力鬥爭嘅洪流之下，堅持自己嘅理想同正義，呢種精神好值得現代人借鑒。但下下都要求人做道德L，會唔會好苛刻，好「離地」呢？其實馮友蘭並冇否定情感同慾望嘅，只要做到「中、和、通」就可以：「中」就係儒家嘅「中庸之道」；從道德方面睇就係「和」，即既滿足私利亦不妨礙他人之利益，就好似孔子所講：「己所不欲，勿施於人」、「己欲立而立人，己欲達而達人」；從制度上來講就係「通」，尋求一個可以滿足最多人、解決最多問題嘅「通義」。所以，馮友蘭所講嘅「德」，其實都係一種類似互惠互愛嘅態度，只要做到呢一點，自己同社會都會得到最大嘅幸福。最後，佢認為人應該不斷追求人生嘅最高境界：由低至高依次序為「自然境界」、「功利境界」、「道德境界」同「天地境界」。頭兩個境界分別係動物（順從慾望）同小人（追求私利）所有，而道德境界就係上一段做到「中和」之道嘅賢人，而最終境界就係「通」天地：為整個社會、整個世界、整個地球謀福祉嘅，「為萬世開大平」嘅聖人境界。雖然馮友蘭認為人死就歸於無，但你留低嘅足印就係不朽嘅：你曾經嘅言行會影響到後世。所以做人應該要立德，貢獻社會，為他人做個榜樣，如果做到好似孔子、耶穌、佛陀、蘇格拉底等聖人咁樣，你嘅精神就真係「大不朽」了。呢本書同《哲學的陌生感》都有著墨人生同死亡嘅問題，亦有一啲共通之處（如陶國璋嘅自我層次同馮友蘭嘅人生境界），可見即使身處唔同時代，大家嘅環境雖然會有唔同，但面對嘅問題大致都一樣。睇前人點樣思考人生，都可以令現代人有所啟發。馮友蘭嘅人生觀，令我更加堅定咁相信「以義安命」，無論世界變成點，都要做好自己應做嘅事，堅持自己嘅正義，希望自己嘅少少綿力可以幫到身邊嘅人，做到「小不朽」嘅目標。唔知下一位思想家嘅人生觀，又會對我有咩新嘅衝擊呢？

6 min
10/26/2022

究讀：陶國璋《哲學的陌生感》 20211029

唔知點解我會喺周末嘅夜晚飲咖啡，結果當然就瞓唔著，所以決定講下陶國璋先生本《哲學的陌生感》。陶生以前喺中大教人文通識同哲學，所以睇完《人生種種》，就當然要睇埋佢地嘅師父點講。本書以「陌生感」為軸心，分自我、死亡、人生三個主題。點解要強調「陌生感」呢？因為人生入面，陌生感係會不斷喺唔同嘅經歷中呈現出來。首先以死亡做例子。人對死亡嘅恐懼，就係源自我地對死亡嘅陌生。人類對未知嘅事物會感到恐懼，而死亡係絕對不可知嘅，我地可能知道生物學上死亡嘅定義，但冇人會知道親歷死亡會係點。有冇死後嘅世界？靈魂會唔會存在？書中有段講得好好，宗教令人臨終有所寄託，因為佢地所講嘅死後世界賜予你存在嘅延續，即使你落地獄，你嘅自我都「仲喺度」。我地嘅存在會消失，呢一點更令人無法想像。咁我地應該點樣去面對死亡呢？作者引用海德格所講：生死係一個整體，死亡嘅虛無突顯存在嘅迫真，所以人先會珍惜有限嘅生命，拋低得失榮辱，享受生命嘅每一刻。孔子都有一句：「未知生？焉知死？」我地自生出來就不斷地被賜予唔同身份，喺咩地方人、係邊個個仔、做緊咩職業…但呢啲功能上嘅標籤，可以幫助瞭解自己嗎？無論我描述得幾具體，我都好似當左自己係一個「他者」咁去觀察，就好似你照鏡嗰陣，你知道鏡中嘅係自己，但同時又唔係自己，因為佢只係從自己投射出來嘅形象。我係邊個？咩係自我？點先可以搵到真正嘅自我呢？作者將自我由低到高分為幾個階段，由生物自我、心理自我、美感自我、到價值自我等，逐級而上。而人唔應該停留喺生物層面、情緒層面嘅自我，而要追求較高層次嘅階段，突顯自我嘅自主性、自我欣賞、自我價值嘅建構等，要透過自我反思去逐步領會。當自我同死亡都係陌生嘅，咁人點樣面義自己嘅人生呢？有存在主義者就強調「荒謬感」：生命無常，冇事物係必然。例如卡謬用希臘悲劇去表達人生嘅荒謬感，我地就好似悲劇嘅主角，受到「命運」嘅玩弄，好多事都無法控制。但咁樣係咪代表人生就係冇意義？非也，就正如希臘悲劇嘅主角，佢地勇於面對命運，冇逃避同接受現實，「活著就是一種反抗」。沙特亦都話，人冇左上帝，所以「註定」係自由嘅，但正因為呢種自由，一切都有可能，我地可以創造自己嘅人生，唔受「命運」嘅束縛。認識自我、面對人生、接受死亡，人自出生就無法迴避呢三大課題。孔子都要「四十而不惑，五十而知天命」，對於人生，我究竟需要幾耐先至睇得透？

5 min
10/23/2022

究讀：好青年荼毒室《人生種種》20211026

2021年就快過去，呢三年發生過太多事，彷彿好似已經過左十年咁，經歷左好多，思考左好多…由當初諗個城市點解會咁、社會應該要點樣，直到知道現實嘅限制，開始反思自己身處嘅位置：我應該點樣面對？我仲可以做啲咩？甚至，乜嘢對我來講先係最重要？究竟做咩先至有意義？當你做人做到懷疑人生嘅時候，你就會發現，世界上種種問題，都不及自己人生總總嘅問題來得切身。由2020年開始follow好青年荼毒室，當初睇佢地係因為對哲學有興趣，坊間又冇乜廣東話嘅哲學平台，但佢地畀到我嘅並唔係哲學咁簡單。佢地好努力咁用哲學知識回應時代，喺我當時迷失嘅時候，為我提供一種解答；除此之外，佢地所講嘅野，成員表達嘅感受，好多都正正係我嘅諗法同感覺，有好多野唔敢講、唔識點講，佢地都幫我講出來，令我知道自己並不孤單。書入面有提過一個哲學家馬格列Avishai Margalit，佢提出身份認同係來自共同嘅記憶，而共同體嘅成員除左有責任記住大家嘅共同記憶之外，仲要將記憶共享。我相信荼毒室做到了。《人生種種》係佢地出版嘅第五本書，無論係小日常定係大時代，在街上定係疫情下，都有佢哋同你探討裏面嘅哲學，刺激你去思考身邊發生嘅事背後有咩意義。喺《人生種種》入面，佢哋探討人生課題，你都可能有諗過：從友誼到愛情、從出生到死亡、從慾望到犧牲等等。全書由探討意義開始，在思考自己的身份，到最後一章探討人生係乜嘢，除咗篇章前後呼應之外，首章同終章都引用到存在主義哲學家沙特嘅講法，就係「存在先於本質」：人存在喺世界上並唔係因為某啲目的，但唔代表我地嘅人生係冇意義，反而因為咁，人係絕對地自由，可以為自己嘅人生創造意義。咁人點樣搵到人生嘅意義呢？就係發掘自己嘅內在價值，正如尼采所講，將人生當作藝術品看待，藝術品本身就價值。就好似去一趟旅行一樣，目的地未必係最重要，旅行嘅過程先係最令人回味嘅。要活出自己嘅精彩人生，又談何容易呢？喺其中一章「執著」入面，我從儒釋道三種東方思想入面得到一啲啟發。首先，儒家提倡以義安命，盡心知天，做好自己應該做嘅事，唔好為控制唔到嘅事物而煩惱。點解有啲野我地控制唔到呢？佛教嘅「空」令我哋知道事物都係變化無常嘅，冇野係永恆嘅，所以唔好對人生太執著；另外，文中對道家「有」同「無」嘅思想有一個好好嘅比喻：人生嘅「無」就好似隻杯咁，滿咗就會瀉，所以如果對事情太執着，不作取捨，就會冇左生命中嘅「可能性」，得唔到真正有價值嘅野。我地要了解自己隻杯（無），先至會知道自己應該「有」啲乜，所以重點唔係你擁有啲乜，而係你係一個點樣嘅人。（純粹自己主觀嘅詮釋同解讀請見諒）講到最後，究竟人生嘅意義係咩呢？書入面並冇一個標準嘅答案，但會鼓勵你透過思考同實踐去搵答案。哲學唔係解答我哋人生嘅疑難，而係你反思嘅工具。蘇格拉底講過，「未經審視的人生是不值得活的」，唔思考人生，唔直接去體驗人生，又點知活着有咩意義呢？

5 min

6 Episodes

「隨心地究講，講究地生存。」江玖(阿玖)：個性主義文7青，讀者自療死sell屎，唔識游水盧亭人，深度中毒獨讀者。

Creator

9gong
Years Active

2K
Episodes

6
Rating

Clean
Copyright

© 9gong
Show Website

究講