臺灣夜市Taiwan Yes

曾偉旻, 央廣工作群,Rti

上蓋媠氣咱寶島，鮮沢時行Let’s Go。 臺灣夜市人呵咾，Taiwan Yes more and more! 《臺灣夜市》希冀透過Yes話題與Yes人物訪談，串接一個饒富趣味，且有層次的生活風格類廣播節目。將臺灣最美、最樸實的傳統新舊、各式文化，重新發掘與包裝。節目也希冀帶領聽眾走進最時尚、最流行、最發燒的議題外，也介紹臺灣各產業發光發熱的人物，或是默默深耕已久的在地專業人士，唯有深入臺灣地方，才能有蓄積的能量，再創國際聲量。 前往＞＞央廣台語粉絲團 聽友來函： 17rti@rti.org.tw

  1. 3d ago

    《雨分雰》：十年心事，月琴佮台語唱予你聽（上）

    十年的性命故事，化做八條台語歌。創作歌手阿雰鄭宜雰，推出台語專輯《雨分雰》，佮資深音樂製作人黃培育和柯智豪合作，收錄伊這十冬來，佇感情佮創作路途的茫茫渺渺、對挵佮成長。 阿雰鄭宜雰，歌迷攏叫伊「小乖」，伊嘛用月琴予臺灣老歌揣著新聽眾。佮黃培育、黃毓家翻唱濟濟傳統台語歌，〈電話〉的短影片，甚至倚近三百萬觀看次數。舊年，伊參與配樂佮音效設計的動畫短片《工》，佇瑞士盧卡諾影展著獎。伊共月琴紮向國際觀眾介紹臺灣音樂，閣教匈牙利演員唱〈望春風〉。 對老歌新唱到家己的創作，這集《臺灣夜市Taiwan Yes!》，邀請阿雰佮製作人黃培育，做伙互相開導，進入「入定」的佛境？若會變做哲學思考的節目，主持人阿旻佮兩位來賓，是笑甲欲反過去，緊來聽這節《雨分雰》內底的性命故事。

  2. Oct 11

    中國代理人 監視賴清德後生被捕

    美國聯邦調查局（FBI）10月初4佇洛杉磯國際機場，逮捕34歲的華裔房地產中人（tiong-lâng，仲介）張婉瑩。彼時準備坐飛行機去上海，涉嫌替中國政府長期監視臺灣總統賴清德的後生賴廷與，予檢方指控「擔任無登記的外國政府代理人」。臺灣總統府10月5日針對這件代誌，批評跟蹤行為「野蠻」，表達嚴厲譴責。 這件事件透露美國政府對中國出手，詳細分析，請聽《臺灣夜市Taiwan Yes!》

  3. Oct 4

    美中台角力：川習會後啥人是贏家？

    川普佮習近平佇白宮會面，美中公布經貿佮科技對話成果，白宮文件煞無提台灣。台灣是「隱形贏家」，抑是大國談判的籌碼？這集《臺灣夜市Taiwan Yes!》，阿旻對峰會成果、外交用字佮二戰歷史敘事，解析美中台之間的角力。 北京要求美國「反對台獨」，佮美方四常講的「無支持台獨」，差別佇佗位？成果文件無寫台灣，敢就代表風險解除？ 面對大國的競爭佮合作，台灣如何透過防衛準備、經濟韌性佮國際連結，增加自主空間？做伙看清楚台灣的未來。

  4. Sep 27

    首都之戰：滷肉飯政治學

    滷肉飯之爭，透露啥物政治學？ 鬍鬚張董事長之子表態支持台北市長蔣萬安，有部分網友講欲抵制；蔣萬安回應：「有人負責四界出征，我就負責吃滷肉飯。」無偌久，金峰滷肉飯的頭家娘嘛公開替民進黨台北市長候選人沈伯洋加油。台北市長選戰，煞變做滷肉飯的話題。 一个人的政治選擇，敢會當代表規間店？咱選欲食佗一碗，是咧揀口味，抑是咧表態？這禮拜《臺灣夜市Taiwan Yes!》，主持人阿旻欲對這場「滷肉飯之爭」來開講：自店家的表態、網路的反應，講到南北對「滷肉飯」、「肉燥飯」的無仝叫法。 一碗飯會予人想著家己的故鄉，嘛會予人看見政治按怎行入日常生活。你心目中上好食的彼碗，是佇佗位？若店家表態支持你無佮意的候選人，你閣會去食無？歡迎來聽節目，做伙分享你的看法。

  5. Sep 20

    稽考台南七股腔口、立志做台語研究 VS 英語老師

    專訪：台南高商學生黃啟軒、肉圓仔 《臺灣夜市Taiwan Yes!》專訪《台語𨑨迌物》Podcast兩位主持人黃啟軒佮肉圓仔，對語言競賽、台語覺醒一路講到AI時代的教育佮研究。 黃啟軒希望記錄家己佮父母、厝邊序大所講的台南七口腔口，對日常開講當中整理地方語詞。未來伊想欲做台語的新聞記者，透過採訪觀察社會，進一步投入台語研究，向台語教授的目標來行。 肉圓仔希望成為英語老師。伊認為，英語教育毋通干焦使用死板的教學方法，應該結合科技，鼓勵學生思考佮表達。 面對AI的發展，兩个人攏認為，AI會當協助揣資料、整理資訊，毋過袂當代替人的思考、感情佮文化經驗。阿旻表示，AI會改變老師、記者佮研究者的工作方式，毋過語言真正的活力，猶原來自逐个人的性命經驗。

  6. Sep 13

    金門話正式成做國家語言　挑戰才開始

    專訪：吳佩貞、陳婉嫈、張慧鈴 老師 《臺灣夜市Taiwan Yes!》台語教師系列第四集，邀請張慧鈴、吳佩貞佮陳婉嫈三位老師，分享in按怎對家庭、教學佮生活行入台語、金門話的世界。 對金門來的吳佩貞老師，用金門話唱出故鄉的山、海佮人情。伊表示，金門話佮台語雖然有共同的語言根源，毋過無論變調、腔口抑是用詞，攏有家己的特色。金門話經過長期倡議，正式納入國家語言體系，毋過提著名分只是第一步，真正重要的，是按怎予語言繼續活落去。 吳佩貞建議，公車、機場、飛行機佮觀光景點攏會當增加金門話，閣會當邀請國小、國中佮高中的學生參與錄音。按呢毋但來金門的旅客聽會著，囡仔嘛會佇日常生活中，自然接觸家己的語言。雖然已經退休，伊猶原投入本土語言教育，甚至學習手語，因為對伊來講，「學一種語言，就加一个世界」。 另外教國文的的張慧鈴老師，出世佇做油飯的家庭。對阿媽彼代開始，厝內就替人準備油飯。逐擺若有人訂貨，半暝一、兩點就愛起來做。看著爸母的辛苦，伊嘛會起來鬥相共。油飯毋但是家族的生理，嘛是一家伙仔共同的記持。 原本教國文的張慧鈴，考入學校無偌久就拄著減班，險險去予人調往僻遠的學校。彼時囡仔才出世三、四個月，交通佮照顧的問題，予伊煩惱甲直直流目屎。後來學校因為台語課程需要人力，伊才有機會留落來。這段經歷，嘛意外改變伊的人生。 毋過，教學現場的挑戰猶真大。一班四十个高中生，可能干焦十个會當用簡單的台語應答。張慧鈴鼓勵學生，講一句有分、唸予同學聽閣再加分，予逐家慢慢仔開喙。雖然學生兩冬無接觸了後，定定閣會共學過的「還」倒轉來，伊猶認為語言需要長時間累積，袂當因為短期看袂著成果就放棄。 陳婉嫈的台語啟蒙老師，是鹽分地帶的重要作家黃勁連。佇臺南社教館學台語的過程中，老師毋但教語言，嘛教台灣歷史，予原本讀中文系的伊，重新理解家己佮這片土地的關係。伊講，進前甚至無意識著家己袂曉講台語；開始學習了後，對人生、社會佮國家的看法攏總反一大反。 面對高中佮高職學生，陳婉嫈認為台語課，毋通一下仔窒傷濟內容，愛先設計活動，予學生共學著的語詞實際用出來。程度較好的學生，嘛會當協助猶無遐熟的同學。若會當進一步佮專業科目合作，就會當真正用佇生活佮工課之中。 三位老師行過無仝款的人生道路，煞攏佇台語相拄搪。對家庭的油飯芳、金門的記持，到台南的文學，台語攏等待，咱重新開喙，共伊講轉來。

  7. Sep 6

    就是愛台語！予台語變做正課 變做生活的語言

    專訪：楊珮琪、尤碧慈、游巧玲 老師 臺語欲行入校園，需要老師共語言佮歷史、文化以及生活連結起來。《臺灣夜市Taiwan Yes!》邀請游巧玲、尤碧慈佮楊珮琪三位老師，分享in佇教學現場教台語的經驗，以及對台語教育的想像。 目前佇國中教歷史的游巧玲表示，這馬的歷史課本已經漸漸改對台灣出發，看向世界。比起過去以中國史做中心的教材，台灣史佮學生生活的所在較接近，嘛較會當引起學習興趣。伊過去就不時佇歷史課內底加入台語，用較趣味的方式介紹台灣史。除了教學，伊嘛參與台語舞台劇演出佮配音課程，對無仝款領域拓展台語使用的可能。 佇內湖國中教國文二十外冬的尤碧慈指出，當地學生講台語的機會較少。老師用台語講課了後，定定愛閣用華語解說一改，學生才有法度理解。雖然台語佇升學競爭的環境內底，較無受重視，伊猶原指導學生參加台語比賽，進一步投入台語教學。未來嘛欲共語言的趣味、民間智慧以及文化智識，融入國文佮台語課程。 楊珮琪對家庭佮教育兩方面實踐台語。伊的查某囝投入小學教育，嘛兼教台語；後生選擇臺北教育大學台語系，成為頭一屆的新生。對臺灣歷史、文學佮文化繼續深造。伊支持囡仔照興趣選擇家己的人生道路，認為台語程度就算猶未遐扭掠，嘛會當對基礎開始學。 三位老師攏認為，台語無應該只是比賽、抑是偷偷仔講的語言。對課堂內的一句台語開始，沓沓仔提懸使用的比例，共台語融入歷史、文化佮日常生活，未來才有機會光明正大，予台語成為學校的「正課」。

  8. Aug 30

    國文、英語佮數學老師攏會講台語　開拓母語教學新路

    《臺灣夜市Taiwan Yes!》主持人阿旻這集邀請康瑞宗、邱麗慧佮林佳慧三位老師，分享𪜶按怎對本身的學科專業出發，共台語帶入校園。 康瑞宗：對國文專業行入台語　佇多元校園開拓母語新視野 康瑞宗本底是國文老師，過去嘛捌擔任學校的組長佮主任。因為教務主任鼓勵，伊參加師大五年的台語師資培育課程，重新轉來做學生。細漢予阿媽𤆬大漢的伊，本底聽有嘛會曉講台語，毋過過去爸、母用台語問，伊定定用華語應。學台語了後，伊毋但閣共台語抾轉來，嘛對語言行入文化、民俗、宗教、現代文學佮小說的世界，接觸過去國文教育較少講著的內容。 康瑞宗服務的華僑高中，有真濟對印尼、越南、泰國佮緬甸來的學生。伊認為，面對語言背景無仝的學生，台語課程愛對基礎開始，嘛愛按照𪜶的生活經驗設計。未來伊希望共五年來所學的智識化做課堂的養份，予本地佮外國學生攏會當透過台語，閣較深入認捌臺灣多元的語言佮文化。 邱麗慧：英語鬥台語　用宜蘭腔佮生活體驗予囡仔趣味學母語 來自宜蘭的邱麗慧是英語老師，因為國、高中開始開設台語課，伊參加台語認證，愈學愈感覺趣味，嘛想欲共台語教學變做退休了後的第二春。伊認為，逐種腔口攏愛有人傳落去。過去宜蘭腔捌予人笑做「庄跤腔」，這馬愈來愈少人講，伊煞愈感覺愛用宜蘭腔教宜蘭囡仔，予地方的聲音，繼續留落來。 邱麗慧定定佇英語課講台語，嘛佇台語課講英語，學生攏講伊是「三語老師」。伊會利用囡仔已經有的英語基礎，幫助𪜶理解台語的發音，嘛透過食食、影片、錄音、寫詩佮演戲等等的活動，予課程閣較好耍。學校也設計作業，鼓勵學生用台語佮序大開講、錄做影片。伊相信，學語言上重要的是興趣，囡仔感覺好耍，才會願意共台語佇生活中使用。 林佳慧：數學嘛會當用台語教　對生活語詞練習邏輯佮思考 林佳慧是數學老師。伊觀察，台北的家長佮學生較注重英語、國文、數學等等的考試科目，影響逐家對無考試的台語學習，意願自然就降低。為著引起囡仔的興趣，伊會先透過影片共學生𤆬入來，閣用生活中看會著的物件，予台語佮日常經驗產生連結，降低開喙講台語的壓力。 林佳慧嘛參與校內跨領域計畫，佮各科老師做伙共台語融入正式課程。伊用「數線」做例，透過向正爿、向倒爿佮單位的變化，引導學生用台語理解數字、位置佮空間，證明數學觀念嘛會當用台語講清楚。伊認為，數學是訓練邏輯佮組織能力，台語予學生用另外一種語言思考。

See All (99)

About

上蓋媠氣咱寶島，鮮沢時行Let’s Go。 臺灣夜市人呵咾，Taiwan Yes more and more! 《臺灣夜市》希冀透過Yes話題與Yes人物訪談，串接一個饒富趣味，且有層次的生活風格類廣播節目。將臺灣最美、最樸實的傳統新舊、各式文化，重新發掘與包裝。節目也希冀帶領聽眾走進最時尚、最流行、最發燒的議題外，也介紹臺灣各產業發光發熱的人物，或是默默深耕已久的在地專業人士，唯有深入臺灣地方，才能有蓄積的能量，再創國際聲量。 前往＞＞央廣台語粉絲團 聽友來函： 17rti@rti.org.tw

Information

  • Creator
    曾偉旻, 央廣工作群,Rti
  • Years Active
    2025 - 2026
  • Episodes
    99
  • Rating
    Clean
  • Copyright
    © Copyright 2018-2026 Rti - For Personal Use Only
  • Show Website
    臺灣夜市Taiwan Yes

You Might Also Like