ငါတို့ခေတ်ရဲ့မဟာဂီတ

Burma Podcast Network
  • 0.0 (0)
  • Music
  • Updated Semiweekly

၁၉၈၀ ကာလများမှာမွေးဖွားခဲ့တဲ့ စာရေးသူရဲ သူ့ခေတ်က သီချင်းတွေသာမက သူလက်လှမ်းမီတဲ့ သူ့ရှေ့က ဂီတအမျိုးအစားတချို့ကနေ သူ့ခေတ်မှာ ခေတ်စားလာတဲ့ဂီတတွေထိ ဆင်းသက်ပေါက်ဖွား လာပုံတွေကို အခုအစီစဉ်မှာ ဆက်စပ်ထားပါတယ်။ အဲ့ဒီဂီတတွေဟာ အခုခေတ်မျိုးဆက်တွေအထိ လွှမ်းမိုးမှုရှိနေတာကြောင့် ဂီတချစ်သူမျိုးဆက်အသီးသီးကို ဂုဏ်ပြုသောအားဖြင့် ပြီးတော့ ရှေးခေတ်က ရွှေနန်းထွက်မဟာဂီတသီချင်းကြီးတွေလို တန်ဖိုးထားသောအားဖြင့် “ငါတို့ခေတ်ရဲ့ မဟာဂီတ” လို့ ခေါင်းစဉ် တပ်ထားတာဖြစ်ပါတယ်။

Episodes

  1. Sep 19

    EP004: ကမ္ဘာ၊ မြန်မာအရွေ့နဲ့ ကော်ပီဂီတခေတ်နှောင်း

    ငါတို့ခေတ်ရဲ့မဟာဂီတ အပိုင်း (၄) ကမ္ဘာ၊ မြန်မာအရွေ့နဲ့ ကော်ပီဂီတခေတ်နှောင်း ဂီတကို ရှေးရိုးစွဲအမြင်တွေနဲ့ကြည့်ကြတာရယ်၊ နိုင်ငံတကာဆက်ဆံရေး၊ ကုန်သွယ်ရေးလုပ်တဲ့ နိုင်ငံဆိုတာ လက်ချိုးရေလို့ရတဲ့ခေတ်ရယ်၊ လူတွေကို ဘာမျှော်လင့်ချက်မှ မပေးနိုင်တဲ့ ၂၁ ရာစုအစောပိုင်းနှစ်တွေရယ် ပေါင်းလိုက်တဲ့အခါ အသစ်သစ်သော အနုပညာကိုဆာလောင်နေသူတွေအတွက် ရေခမ်းငါးတွေလို ဖြစ်ခဲ့ဖူးပါတယ်။ လမ်းပေါ်ကထီလှည်းမှာဖွင့်ထားတဲ့သီချင်းတွေထဲ အခွေသစ်ပါပြီဆိုရင် ထီသည်ကို ဖားပြီး ကိုယ့်လမ်းထဲမှာ ကြာကြာရပ်ခိုင်းခဲ့ရတဲ့လူတွေ အများကြီးပါပဲ။ ဂုဏ်သရေအပြားပြားရှိတဲ့ ဂီတအသစ်မျိုးစုံဟာ ခွေးတိုးပေါက်တွေက ဝင်ခဲ့ရတယ်။ ခေတ်မကောင်းလို့ ဝပ်နေခဲ့ရတယ်။ ဂီတဝပ်နေရတယ်ဆိုတာ တကယ်တော့ လူ့အဖွဲ့အစည်းရဲ့တိုးတက်မှုက ဝပ်နေခဲ့ရတာဖြစ်ပါတယ်။ ဂီတဟာ လူ့စိတ်ထဲကအညစ်အထေးတွေကို ဆူနာမီလှိုင်းလို တိုက်စားနိုင်တာကို လူတွေကကြောက်ကြတယ်လေ။ အနုပညာကဝိကြီးရာဘင်ဒြာနတ်တဂိုးကလည်း “သင့်ဂီတ၏ သန့်စင်သောရေအလျဉ်သည် ကျောက်စိုင်ကျောက်သား အဆီးအတားမှန်သမျှ ချိုးဖျက်ကာ အဟုန်ဒီးဒီး ရှေ့သို့စီး၏” (ဂီတဉ္စလီ - မြင့်စိုးလှိုင်ဘာသာပြန်) တဲ့။ အခုအပိုင်းမှာ အဟုန်ဒီးဒီး စီးလာတဲ့ရေအလျဉ်က စာရေးသူကို ဘယ်လိုတိုက်စားပြီး ဘယ်လိုအတွေးတွေနက်နဲစေခဲ့လဲဆိုတာ နားဆင်ကြရမှာဖြစ်ပါတယ်။ ထုံးစံအတိုင်း မြန်မာ၊ ကမ္ဘာ အရွေ့၊ စာရေးသူရဲ့အရွေ့ကို ကိုယ့်ဘဝဖြတ်သန်းမှုနဲ့ယှဉ်ပြီး ရင်ခုန်စရာကြားကြရမှာပါ။ ဂီတမိတ်ဆွေတို့ကို ကိုဝီရက ပြောပြပါလိမ့်မယ်။ ငယ်ဘဝမှာကြားဖူးကြမယ့်သီချင်းတီးလုံးတွေကို ထည့်ပေးထားပါတယ်။ ပြောနေတဲ့သီချင်းနဲ့ ထည့်ထားတဲ့သီချင်းကိုက်ညီတာထက် ဂီတအမျိုးအစားကိုက်ညီမယ့် တီးလုံးတွေကိုသာ ရွေးချယ်ထားပါတယ်။ ဘုရားသခင်ဆီရောက်ဖို့ဆို ဂီတတံခါးကို အရင်ဖြတ်ရမယ်လို့ယုံကြည်လျက်၊ မူလဖန်တီးခဲ့ကြသူများကို ဂုဏ်ယူလေးစားလျက် BPN က ငါတို့ခေတ်ရဲ့မဟာဂီတ နောက်ထပ်တစ်ပိုင်းတင်ဆက်လိုက်ရပါတယ်။ KoRn- Blind Kid Rock - Bawitdaba If I could tell you – Yanni (sheet music) Matsuri – Kitarō (sheet music) Trouble – Coldplay (sheet music) တဖြည်းဖြည်းနဲ့ - The Ants နောက်ဆုံး - အယ်ဖြူ အမြဲတမ်း - မောင်မောင်ဇော်လတ် Chapters: (00:00) Introduction (01:25) Woodstock99 (02:59) NewAge (07:43) Post Britpop နဲ့ Indie rock Burma Podcast Network မှ ထုတ်လွှင့်ထားသော Podcast များကို နားဆင်နိုင်ရန် ⁠⁠⁠https://linktr.ee/burmapodcastnetwork⁠

  2. Jul 4

    EP003: ၂၀၀၀ ခုနှစ်တွေရဲ့ အနောက်ကမ္ဘာဂီတ

    ငါတို့ခေတ်ရဲ့မဟာဂီတ အပိုင်း (၃) ၂၀၀၀ ခုနှစ်တွေရဲ့ အနောက်ကမ္ဘာဂီတ စာရေးသူလက်လှမ်းမီသလောက်စုစည်းထားတဲ့ ၂၀၀၀ ခုနှစ်တွေတုန်းက အနောက်တိုင်းဂီတအမျိုးအစားတွေကို ပြောပြထားတဲ့အပိုင်းဖြစ်ပါတယ်။ မြန်မာပြည်မှာခေတ်မစားသေးပေမဲ့ အနောက်တိုင်းမှာ ခေတ်ကုန်နေပြီဖြစ်တဲ့ ဂီတတွေအပြင် IDM, Post-Britpop, Indie rock, Pop Punk, Post-grunge, Nu metal, Emo, Hip Hop စတဲ့ ဂီတပေါင်းစုံ၊ ဂီတအဖွဲ့ပေါင်းစုံကို ဂီတမိတ်ဆွေတွေအတွက် ဗဟုသုတပွားပြီး အရသာခံနိုင်ဖို့ တင်ဆက်လိုက်ရပါတယ်။ တီးလုံးတွေကိုတော့ ထုံးစံအတိုင်း မူလဂီတအမျိုးအစားနဲ့ အနီးစပ်ဆုံးတွေကိုပဲ ရွေးချယ်ထည့်သွင်းပေးထားပါတယ်။ ညွှန်းထားတဲ့ဂီတတွေနဲ့ မူရင်းသီချင်းတွေကိုတော့ ဆိုင်ရာချန်နယ်တွေမှာ သွားရောက်နားဆင်နိုင်ကြောင်းပါ။ Chapters: (00:00) Introduction (03:31) IDM (05:16) Post-Britpop နဲ့ Indie Rock (06:04) Pop Punk (07:05) Alternative rock, Post-grunge (08:28) Nu Metal (09:42) Emo, Screamo (11:04) Hip Hop Burma Podcast Network မှ ထုတ်လွှင့်ထားသော Podcast များကို နားဆင်နိုင်ရန် ⁠⁠https://linktr.ee/burmapodcastnetwork⁠

  3. Mar 14

    EP002: Alternative ကိုယ်ပိုင်သံစဉ်

    ငါတို့ခေတ်ရဲ့မဟာဂီတ အပိုင်း (၂) Alternative ကိုယ်ပိုင်သံစဉ် ဂီတဆိုင်ရာအစီစဉ်တစ်ခုဖြစ်တဲ့ “ငါတို့ခေတ်ရဲ့မဟာဂီတ” နောက်တစ်ပိုင်းလာပါပြီ။ ဒီနေရာမှာ နားစိုက်ကြသူ ဂီတမိတ်အပေါင်းကို BPN က အလေးအနက် တောင်းပန်စရာတစ်ခုရှိပါတယ်။ လိုတိုရှင်းပြောရရင် အခုအစီစဉ်ကို တစ်ပိုင်းပြီးတစ်ပိုင်း ခပ်စိပ်စိပ်မတင်ဆက်နိုင်တဲ့ကိစ္စပါ။ BPN အနေနဲ့ အပတ်စဉ်ထုတ်လွှင့်နေကျ အစီစဉ်တွေကိုရေးဆွဲကြရာမှာ အနည်းဆုံး နှစ်လသုံးလခန့် ကြိုတင်ပြင်ဆင်ကြရပါတယ်။ ဒါ့ပြင် တစ်ပတ် တစ်ပုဒ်သာ ထုတ်လုပ်ဖြန့်ချိကြတဲ့အတွက် ဂီတအပိုင်းတွေဟာလည်း အပတ်စဉ်အလှည့်ကျဇယားအတိုင်းသာ တင်ဆက်နိုင်ခဲ့ပါတယ်။ ဒါပေမဲ့ အခုအခါမှာတော့ ထုတ်လုပ်ဖြန့်ချိရေးဇယားမှာ ဂီတအပိုင်းတွေကို ပိုမိုအလှည့်ပေးနိုင်အောင် ရှေ့ကအားနည်းချက်တွေကို မွမ်းမံပြင်ဆင်ထုတ်လုပ်သွားမှာ ဖြစ်ကြောင်း သတင်းကောင်းပါးချင်ပါတယ်။ နောက်တစ်ချက်က ဒီအပိုင်းတွေထဲမှာ အစီစဉ်တင်ဆက်သူပြောတဲ့အတိုင်း နောက်ခံသီချင်းတွေကို တစ်ခုချင်းစီထည့်ထားတာမျိုးမဟုတ်ကြောင်း အသိပေးပြောကြားလိုတာဖြစ်ပါတယ်။ သီချင်းတွေထည့်ရာမှာ တင်ဆက်သူပြောတဲ့ ဂီတအမျိုးအစားတိုင်းလိုက်ပြီးထည့်ရင် ပြွတ်သိပ်ကြပ်ပြီး သီချင်းတွေချည်း အာရုံရောက်သွားနိုင်တာမို့ သတိထားရှောင်ကြဉ်ထားတာဖြစ်ပါတယ်။ ဒါကြောင့် ဂီတမိတ်ဆွေတွေ သိကြတဲ့ထဲကသီချင်းတချို့နဲ့ နိုင်ငံတကာကသီချင်းတချို့ကို ပုံစံပြောင်းထည့်သွင်းတာ၊ ဂီတအမျိုးအစားအလိုက် အနီးစပ်ဆုံးတီးထားတဲ့ တီးလုံး၊ တီးကွက်တွေထည့်ထားတာဖြစ်ပါတယ်။ သီချင်းတွေကိုကိုးကားရာမှာလည်း အတတ်နိုင်ဆုံး အတိုချုံးပြီးထည့်သွင်းထားပါတယ်။ အနုပညာကို နဂိုမူလဖန်တီးသူ၊ ဆင့်ပွားဖန်တီးသူ စသဖြင့် လေးစားထိုက်သူအားလုံးကိုလေးစားဂုဏ်ယူစွာဖော်ပြလိုက်ရပါတယ်။ အားလုံး နားဆင် အတွေးပွား ရှာဖွေကျေနပ်နိုင်ကြပါစေ။ Chapters: (00:00) Introduction (10:09) စမ်းသပ်ခဲ့သူတချို့ (11:35) ခုန်ပျံကျော်လွှား ရောင်စုံချောကလက်များ Burma Podcast Network မှ ထုတ်လွှင့်ထားသော Podcast များကို နားဆင်နိုင်ရန် ⁠⁠https://linktr.ee/burmapodcastnetwork⁠

  4. Jan 10

    EP001: ၈၀-၉၀ ခုနှစ်လွန်ကာလများ

    ငါတို့ခေတ်ရဲ့မဟာဂီတ မိတ်ဆက် ဂန္ထဝင်ဖြစ်မှုဆိုတာမှာ ခေတ်အဆက်ဆက် မှတ်တမ်းအစဉ်၊ ကျမ်းအစဉ်မှာ သမိုင်းဝင်ဖော်ပြခံရမှု၊ လက်ရှိထိလည်း မတိမ်ကောသေးမှု စတာတွေပါဝင်ပါတယ်။ စာပေနဲ့အနုပညာလောကမှာ အမေမာလို့ ခေါ်ကြတဲ့ လူထုဒေါ်အမာကလည်း “ပေမီဒေါက်မီရှိမှု၊ ခမ်းနားမှုနဲ့ ဂုဏ်ယူနိုင်လောက်မှု၊ ယဉ်ကျေးမှုအမွေအနှစ်ဖြစ်မှု” ဆိုတဲ့ အတိုင်းအတာနဲ့ ဂန္ထဝင်ဆန်တာကို လက်တွေ့ကျကျဖွင့်ဆိုပါတယ်။ တကယ်တော့ “ငါတို့ခေတ်ရဲ့မဟာဂီတ” အစီစဉ်က ရှေးကတီးမှုတ်ရေးသားသီဆိုခဲ့ကြတဲ့ ကြိုး၊ ဘွဲ့၊ ပတ်ပျိုး၊ ယိုးဒယား အစရှိတဲ့ မဟာဂီတသီချင်းကြီးတွေအကြောင်းမဟုတ်ပါဘူး။ မဟာဂီတဆိုတာ နာမည်နဲ့အညီ သီချင်းကြီးလို့ အလွယ်ပြောနိုင်တယ်။ ခေတ်အဆက်ဆက် ကျမ်းအစဉ်နဲ့ သမားစဉ်အဆက်ဆက် လက်ဆင့်ကမ်းပေါက်ဖွားခဲ့တဲ့ဂီတ။ ပဒေသရာဇ်ခေတ်ကတည်းက တည်ရှိမှတ်တမ်းတင်ခဲ့ကြလို့ ရွှေနန်းထွက်မဟာဂီတလို့လည်း တော်ဝင်အသုံးနဲ့သုံးနှုန်းကြပါတယ်။ ဒါပေမဲ့အခုတင်ဆက်မယ့် ပေါ့ဒ်ကတ်စ်တွေထဲမှာ ကမ္ဘာကနေ မြန်မာကို ကူးလူးလာတဲ့ နိုင်ငံတကာဂီတ အမျိုးအစားတွေနဲ့ ကိုင်းခွဲတွေအကြောင်းကို စာရေးသူဖြတ်သန်းခဲ့တဲ့ ခေတ်အပေါ်မူတည်ပြီး ခံစားသုတေသနပြုထားမှာ ဖြစ်ပါတယ်။ အနောက်တိုင်းမှာ ပေါ်ပြူလာမြူးဇစ်လို့‌ခေါ်ကြတဲ့ ဂျက်ဇ်၊ ဘလူးစ်၊ ရော့ခ်အဲန်ရိုး၊ ရော့ခ်၊ ဟဲဗီးမက်တဲလ် အစရှိတဲ့ဂီတအမျိုးအစားတွေဟာ အခုလက်ရှိ ၂၁ ရာစုထဲမှာဆိုရင် ဂန္ထဝင်ဂီတစာရင်းဝင်နေပါပြီ။ ၂၀ ရာစုအလယ်နဲ့ နှောင်းပိုင်းဂီတရေစီးကြောင်းဟာ အရင်လို နှစ်ရာထောင်ချီရှိတဲ့ သမိုင်းတန်ဖိုးတွေ၊ ဂီတဆင့်ကဲဖြစ်စဉ်တွေရှိမှ ဂန္ထဝင်မဟာဂီတဖြစ်လာသလိုမျိုး မဟုတ်တော့ပါဘူး။ ခေတ်ကာလတိုတိုထဲမှာပဲ နည်းပညာတိုးတက်မှု၊ တူရိယာပစ္စည်းတီထွင်မှု‌၊ ယဉ်ကျေးမှုအရွေ့အပြောင်း၊ ခံစားရှုမြင်ဖန်တီးမှုတွေ ရှိလာခဲ့တာပါ။ အဲ့ဒီအနုပညာသမားနဲ့ ဖန်တီးသူတွေဟာ ဘဝတိုတို၊ အချိန်တိုတိုတွင်းမှာပဲ ဂီတအနုပညာကို အကြမ်းဆုံး၊ အကောင်းဆုံး ဂန္ထဝင်မြောက်၊ ဒဏ္ဍာရီမြောက် ဖန်တီးခဲ့ကြတာဖြစ်ပါတယ်။ ဒါ့ကြောင့် ဒီဂီတတွေကို ပညာရပ်သရုပ်ခွဲသူတွေက ကွန်တမ်ပိုရာရီကလပ်စစ်၊ နီယိုကလပ်စစ် စသဖြင့် သမုတ်ကြပါတယ်။ ၁၉၈၀ ကာလများမှာမွေးဖွားခဲ့တဲ့ စာရေးသူရဲ့ သူ့ခေတ်ကသီချင်းတွေသာမက သူလက်လှမ်းမီတဲ့ သူ့ရှေ့က ဂီတအမျိုးအစားတချို့ကနေ သူ့ခေတ်မှာ ခေတ်စားလာတဲ့ဂီတတွေထိ ဆင်းသက်ပေါက်ဖွား လာပုံတွေကို အခုအစီစဉ်မှာ ဆက်စပ်ထားပါတယ်။ အဲ့ဒီဂီတတွေဟာ အခုခေတ်မျိုးဆက်တွေအထိ လွှမ်းမိုးမှုရှိနေတာကြောင့် ဂီတချစ်သူမျိုးဆက်အသီးသီးကို ဂုဏ်ပြုသောအားဖြင့် ပြီးတော့ ရှေးခေတ်က ရွှေနန်းထွက်မဟာဂီတသီချင်းကြီးတွေလို တန်ဖိုးထားသောအားဖြင့် “ငါတို့ခေတ်ရဲ့ မဟာဂီတ” လို့ ခေါင်းစဉ် တပ်ထားတာဖြစ်ပါတယ်။ နိုင်ငံတကာက သီချင်းပေါင်းစုံ၊ ဂီတအမျိုးအစားပေါင်းစုံနဲ့ မြန်မာပြည်ရဲ့ နှောင်းခေတ်ဂီတရေစီးကြောင်းကို ကဗျာဆရာ၊ စာရေးဆရာ မောင်ယုပိုင်က ခံစားသုတေသနပြု ဇာတ်ညွှန်းရေးဖွဲ့ပါတယ်။ ဒါတွေကို လက်ဆင့်ကမ်းခံစားရင်ခုန်ပြောပြမယ့်သူက ဂီတသမား၊ အဆိုတော်၊ သီချင်းရေးဆရာ ဝီရမိုးနေဖြစ်ပါတယ်။ ဒီနေရာမှာ ရှင်းလင်းချင်တာက တချို့သော ဂီတသမားများ၊ အနုပညာသမားများဟာ ၎င်းတို့ဖြတ်သန်းခဲ့တဲ့ ဂီတသမိုင်းရှိသော်ငြား ခုခေတ်ကာလအရ ဝိဝါဒမကွဲခြင်း၊ လူ့အဖွဲ့အစည်းထဲက ပေါ်ပေါက်ခဲ့တဲ့ဂီတတွေရဲ့ အနှစ်သာရကိုမှမထောက် ပြည်သူကိုစော်ကားခြင်းအပါအဝင် ပြည်သူကိုမျက်နှာမမူဘဲ အကျိုးစီးပွားနဲ့ ကျော်ကြားမှုလောက်ကိုသာ ရှေ့တန်းတင်ကြတဲ့အတွက် သူတို့နာမည်တွေ၊ ရုပ်ပုံတွေ၊ သီချင်းတွေကို ချန်လှပ်ထားခဲ့ပါတယ်။ ဒါပေမဲ့ BPN အနေနဲ့ သမိုင်းကို အဂတိကင်းကင်းချဉ်းကပ်လိုတဲ့အတွက် သူတို့သီဆိုခဲ့တဲ့ သီချင်းခွေနာမည်နဲ့ သီချင်းနာမည်တွေကိုတော့ အစီစဉ်တွင်း ထည့်သွင်းဖော်ပြသွားမှာ ဖြစ်ပါတယ်။ ပေါ့ဒ်ကတ်စ်ထဲမှာပါတဲ့ ဖော်ပြတဲ့ ပြည်တွင်းဖြစ် နိုင်ငံခြားမိတ္တူ သီချင်းတွေကိုလည်း မူလဖန်တီးသူတွေနဲ့ ဆင့်ပွားဖန်တီးသူတွေရဲ့ ဂီတပညာကို လေးစားစွာဖြင့်ဖော်ပြပါတယ်။ ဂီတချစ်သူများအားလုံး ကလိယုဂ်ခေတ်ဆိုးထဲ အာလျပြေရာပြေကြောင်းနဲ့ သုတရသပွားများနိုင်ကြစေကြောင်း စေတနာအရင်းခံပြီး BPN က ပူးပေါင်းစီစဉ်တင်ဆက်လိုက်ရပါတယ်။ Chapters: (00:00) Introduction (01:45) ပြည်တွင်းဖြစ် ရော့ခ် (07:45) Speed Metal ကို မမီနိုင်သေးတဲ့ ၉၀ခုနှစ်နှောင်းပိုင်းများ Burma Podcast Network မှ ထုတ်လွှင့်ထားသော Podcast များကို နားဆင်နိုင်ရန် ⁠⁠https://linktr.ee/burmapodcastnetwork⁠

  • 4 Episodes

About

၁၉၈၀ ကာလများမှာမွေးဖွားခဲ့တဲ့ စာရေးသူရဲ သူ့ခေတ်က သီချင်းတွေသာမက သူလက်လှမ်းမီတဲ့ သူ့ရှေ့က ဂီတအမျိုးအစားတချို့ကနေ သူ့ခေတ်မှာ ခေတ်စားလာတဲ့ဂီတတွေထိ ဆင်းသက်ပေါက်ဖွား လာပုံတွေကို အခုအစီစဉ်မှာ ဆက်စပ်ထားပါတယ်။ အဲ့ဒီဂီတတွေဟာ အခုခေတ်မျိုးဆက်တွေအထိ လွှမ်းမိုးမှုရှိနေတာကြောင့် ဂီတချစ်သူမျိုးဆက်အသီးသီးကို ဂုဏ်ပြုသောအားဖြင့် ပြီးတော့ ရှေးခေတ်က ရွှေနန်းထွက်မဟာဂီတသီချင်းကြီးတွေလို တန်ဖိုးထားသောအားဖြင့် “ငါတို့ခေတ်ရဲ့ မဟာဂီတ” လို့ ခေါင်းစဉ် တပ်ထားတာဖြစ်ပါတယ်။

Information