Emisión en sefardí

Radio Exterior

La "Emisión Sefarad" es un programa kultural de radio, en lingua sefardí o djudeo-espanyol. Sefarad es uno de los nomvres de Espanya, i el sefardí es una lingua de baza medieval a la ke se adjuntan palavras de los dialektos i linguas de las sivdades onde los sefaradim moravan. Matilda i Rajel Barnatán, madre i ija, aparejan i prezentan las emisiones i sus kontenido por entero:entrevistas, presonajes, folklor i múzika de ancha diversidad, aktividades, tradisiones, literaturas i una lingüístika atada a la kultura ke tyene sus raízes en Espanya. Ansí "Emisión Sefarad" guadra el trezoro poétiko de los S X al XII en uno de los grandes patrimonios kulturales entregados a la umanidad. Ansiemzmo la kreasión kontemporánea arrebive en muestros días i atira el intereso de oyentes de diversos lugares i paízes. Viviana Barnatan (colaborador externo)

  1. 5d ago

    Emisión en sefardí - Kuzina kon arte sefardí: Pishkado gizado i Kurabyes - 02/08/26

    Kompartimos un kompleto programa en la "Kuzina de Emisión Sefarad": Pishkado gizado kon mues, Pimintones asados i de dulsurias: Kurabyes. Vos azemos musafires a los oyentes en la "Kuzina de Emisión Sefarad", kon muevas rechetas i kantes gastronómikos. Las kumidas son parte destakada de la tradisión oral sefardí, rechetas savuridas kon diversos platikos para gostar. En este programa partajamos las rechetas de "Pishkado gizado kon mues o almendras", i "Pimintones asados inchidos de kezo i fritos". Para muestra mesa en dulsurias ofresemos la recheta de unos rikos "Kurabyes" dulsurias tradisionales sefardim muy kolay de aparejar.  En Patrimonio muzikal sentimos el "Romanse de las Tres ermanikas" i ermozeamos el programa kon kantes gastronómikos "Los guisados de las berendjenas" en la versión de Marga Grajer i "La kumida del aní" (del prove) en la versión de Paco Díez en boz i Raúl Olivar en guitara. Kurunamos el programa kon el kante "La komida la manyana" ke interpreta Marlène Samoun. "Emisión Sefarad, las rechetas sefardim de djenerasión en djenerasión asta oy" Escuchar audio

  2. Jul 26

    Emisión en sefardí - David Galante, superbiviente sefardí del Holocausto. Omenaje - 26/07/26

    Kompartimos la istoria de David Galante, superbiviente del Holocausto, nasido en Rodas (Grecia), el milagro de sobrebivir a Auschwitz. Sus padres i sus tres ermanas fueron asesinadas por los nazis en el kampo. En la foto ke akompanya al programa la famyia de David, asesinada en Auschwitz. Omenaje a David Galante, sefardí nasido en la Isla de Rodas, en Grecia, el 21 de Agosto de 1925, superbiviente del Holocausto, Shoá, kon soltanto 17 anyos fue yevado a los kampos de la muerte nazis injunto a su famyia. Por el tiempo de 50 anyos no pudo ni kisho avlar de la vida en Auschwitz, ma dempués se konvensió ke devía kontarlo todo i dar ensenyanza de su vida i lucha. Dempués de la liverasión Auschwitz se topó kon su ermano Moshé, ke no savían uno del unotro ke se topavan kon vida, se enteraron traverso un mesaje de la Radio Vaticano.¿Komo fue la vida de David Galante en el kampo de eksterminio? ¿Kómo reushó en su terivle lucha por sobrebivir? ¿Kómo fue su vida dempués en Buenos Aires, Argentina? Un omenaje a David Galante ke murió en Buenos Aires, Argentina en 2020. En el Museo del Holocausto de Buenos Aires (Argentina) i en Yad Vashem (Israel), se guadra dokumentasión i fotos de su istoria.Te kontamos un triste i terivle echo ke le akontesió en Auschwitz i ke kuenta David en un livro sovre su vida. En Patrimonio muzikal sentimos el kante kompozado por Flory Jagoda ke dedikó a Sefarad "A España" versión injunto a Ramón Tasat i melodías jasídikas i sefardim interpretadas en piano i chelo por Perla Gonilski i Marcelo Bru. Kurunamos el programa kon el kante "Arvolés yoran por luvias" se dize ke los sefardim kantavan i rekodravan este kante en "muestra lingua"en los kampos de konsentrasión i eksterminio nazis, versión de Isaac Levy. "Mi vedradera liverasión fue kuando pude empezar a kontar" David Galante (Rodas, 1925 - Buenos Aires, 2020) Escuchar audio

  3. Jul 19

    Emisión en sefardí - España 1492 ¿Ke akontesió kon los ekspulsados en Francia i Portugal? - 19/07/26

    Kompartimos investigasiones istórikas poko konosidas ¿Kómo fue la vida de los djudiós espanyoles dempués de la ekspulsión de España en 1492? ¿Onde fuyeron? Los djudiós espanyoles tuvieron ke fuyir deshando sus moradas i propiedades, munchos fuyeron en verso Francia, onde dempués de la Inkizisión en Portugal en 1536 los kristianos muevos o kripto-djudiós tomaron kamino en verso el Sud-Oeste de Francia. Vos kontamos ke pasava i komo fue su istoria, ke derechos tuvieron i onde se fueron a morar. Las kondisiones fueron trokando, parte de los djudiós espanyoles i portuguezos pudieron tornar a sus paízes de nasimiento de bez en kuando. ¿Ke akontesió por enshemplo en Holanda? Holanda se trokó en un importante sentro de vida para los djudiós ke fuyeron de España i Portugal. En este programa aportamos muncha investigasión istórika kon datos poko konosidos. Ansimezmo te kontamos la istoria de lo ke akontesió kon los djudiós en Inglaterra, importantes informasiones sovre los kripto-djudiós ke kontinuavan kon sus fe reiljiosa djudía de modo okulto, ma por fuera eran kristianos, i komo se permetió la kreasión de una mueva Komunitá Djudía en Londres. En Patrimonio muzikal mos akompanyan kantes i romases komo "La galana y el mar" en la versión de Mónica Monasterio i el "Romanse de las tres ermanikas" interpretado por el Grupo A Ballare. Kurunamos el programa kon el kante litúrjiko "Bendigamos" en la versión de Viviana Rajel Barnatán. "Emisión Sefarad, Istoria de las muevas Komunitades dempués de 1492: Francia, Portugal, Holanda, Inglaterra" Escuchar audio

  4. Jul 12

    Emisión en sefardí - Los Sefardíes, el Holocausto i el réjimen de Franco - 12/07/2026

    Informamos a los oyentes sovre el Holocausto, los sefardim i el apoyo de Franco.  Dientro del Congreso Legado Sefardí organizado en Zamora por el Centro Isaac Campantón kompartimos investigasiones: ¿Kualo akontesió? ¿Ke fue lo ke les permitió a los sefardim? ¿Ke akontesió kon las Komunitades Sefardim en el Holocausto i dempués?. Entrevista a Ricardo Angoso, periodista i eskritor ke ofresió la Ponensia "Los Sefardíes, el Holocausto y el régimen de Franco". Temas de la entrevista: La pozisión de Franco en atadura a los sefardím desde 1939 a 1945, Ricardo mos kontará komo troka la istoria. Las sivdades i Komunitades Sefardim de Evropa ke fueron destruídas i sus presonas asesinadas por los nazis, kon datos sovre komo amenguaron estas importantes Komunitades. Ansimezmo mos va a dar a konoser onde moravan los Sefardim en Evropa: Grecia, kon la Komunitá sefardí más importante i numerosa, tambyén Yugoslavia, Rumanía, Bulgaria, Europa Occidental, España i Portugal. Aportará datos de números de povlasión sefardí i komo la gran parte de las presonas fueron eksterminadas por los nazis. La Diáspora Sefardí ke avlava el sefardí o djudeo-espanyol i la importansia de la konservasión de la lingua. Kurunamos el programa kon el kante "Printzesita" en la versión de Flory Jagoda. "Emisión Sefarad, el Legado Sefardí: rikeza del pazado al oy" Escuchar audio

  5. Jul 5

    Emisión en sefardí - Congreso Zamora Legado Sefardí. Transmisión i konservasión - 05/07/26

    Informamos a los oyentes sovre el Congreso Internacional Legado Sefardí, basho lema Transmisión, Reparación y Conservación, es la edisión numeró 14 de este Congreso organizado en Zamora por el Centro Issac Campantón, kon Jesús Jambrina a la kaveza, un destakado Congreso kon distintas temátikas kon ponensias sovre istoria del Legado Sefardí, traverso su transmisión i konservasión. Entrevista a Jesús Jambrina, organizador del Congreso de ken vamos a konoser las ponensias, temátikas i ponentes. Algunos temas del Congreso Legado Sefardí: "Los sefardíes, el holocausto y el régimen de Franco" por el periodista Ricardo Angoso, "Testimonio y escritura del legado sefardí" por la eskritora Bella Ventura o "Narrativas digitales y transmisión del Legado judío en el siglo XXI", "La mujer sefardí: Transmisora de la lengua y la memoria" por Viviana Rajel Barnatán. Ponentes del mundo por entero adjuntan su saver sovre los mijores modos de konservar i transmitir la lingua, kultura, istoria i literaturas del kompleto Legado Sefardí, ansimezmo kon proyeksión de un dokumental "En los pasos de Abraham" de Daniel Goldberg Lerner. Tres días de un destakado Congreso kon un kompleto programa para meter en valor muestro Legado. Kurunamos el programa sintiendo la nana "Durme durme mi andjeliko" en la versión del Grupo A Ballare. "Emisión Sefarad, konosiendo i difuzando el valor del Legado Sefardí en el mundo por entero" Escuchar audio

  6. Jun 28

    Emisión en sefardí - La Djudería de Sevilla: kultura i turismo. Angie Moreno - 28/06/26

    Sevilla entró esta anyada 2026 en la Red de Juderías de España, es una Djudería kon una profunda istoria de su Komunidad. Entrevista a Angie Moreno, teniente de alcalde y delegada de Turismo y Cultura del Ayuntamiento de Sevilla para konoser los proyektos en turismo i kultura en la Djudería de Sevilla, i la última deskuverta de un Mikve (banyo ritual djudío) en frente de onde se topava la Sinagoga. La Komunidad Djudía de Sevilla fue una de las más importantes de todo Sefarad, la Komunidad djudía yegó a kontar kon más de unos 4.000 djudiós, i fue la sigunda djudería más grande de España dempués de la de Toledo, es por esto ke los djudiós de Sevilla kontaron kon un destakado rolo en el komersio I desvelopando la ekonomía de la sivdad, indemás de kontar kon lavoros komo artesanos, tejedores, alfareros i más, kon ancha influenza en la kultura i la literatura. Estas gueyas kedaron en la sivdad malgrado ke varias Sinagogas fueron trokadas en Eklisas, es por esto ke oy kontamos en la entrevista kon Angie Moreno, teniente de alcalde i delegada de Turismo y Cultura del Ayto. de Sevilla. Indemás konversamos kon Angie sovre los proyektos del avenir: la Ruta Sefardí, un paseo por la Djudería para poder vishitarla kon toda su rikeza istórika, las Sinagogas, oy Eklisas, la Iglesia de Santa María La Blanca, Iglesia de San Bartolomé i la ke fue parrokia de Santa Cruz destruida por los franzeses a empesijos del siglo XIX. Konose toda la aktualitá de la Djudería de Sevilla, una importante Djudería en todos los rolos, sosial, ekonómiko, literario, relijioso i kultural. Kontinuaremos dando a konoser la istoria de la destakada Djudería de Sevilla i todo su enfloresimiento kultural i material, tambyén la parte más preta, en programas del avenir. Kurunamos el programa sintiendo el kante tradisional sefardí "Los Bilbilikos" ke interpreta la kantadera Judy Frankel. "Emisión Sefarad: La lus i la solombra de las Djuderías, sakando siempre el pazado istóriko a la lus" Escuchar audio

  7. Jun 21

    Emisión en sefardí - Komo tener una vida más espiritual: mirando más lejos - 21/06/26

    Ofresemos a los oyentes un kapitoló de espiritualidad: ¿Kómo tener una vida más espiritual? ¿Kómo el pensamiento i los aktos krean enerjías espirituales? La tradisión sefardí se baza en la espiritualidad, tanto en las bindisiones komo en las orasiones i los savios ofresen sus konsejos para kontar kon una vida más espiritual. Tambyén las festividades kontan kon sus butos (objetivos) espirituales. Vos deshamos importantes konsejos en este programa. Eksplikasiones de ke es la visión espiritual, la ke va más ayá de los 5 sentidos. Komo alimpiar el pensamiento i alejar los pensamientos negativos. Komo lavorar en mi alma para poder suvir de nivel espiritual mijorando mi vida i la de las presonas ke me arodean, famyia i amigos. Los kantes ke akompanyan este programa tambyén yevan mesajes espirituales en su poesía: Poesías de Juan Gelman en sefardí "Qui lindus tus ojus" i ¿Ondi stá la yave di tu corasón?, poesías kantadas kon múzika i la boz de la kantadera sefardí Dina Rot. Indemás kompartimos la kompla de Tu Bishvat "El debate de las flores" interpretado por Rajel Barnatán (Aresivida por la informante Clarita Benahim, z"l, de la CJM). Kurunamos el programa kon el kante kontemporáneo ke mos avla de la bindisión de las manos ke krean "Kon mis manos" poesía de Matilda Kohen Sarano i múzika de Horacio Lovecchio en la boz de Mónica Monasterio. "Emisión Sefarad: Un kamino espiritual en el djardino sefardí" Escuchar audio

  8. Jun 14

    Emisión en sefardí - Proyekto Sefardí de Kahn: livro de Romancero - 14/06/26

    El Romancero de Máximo J Kahn, un livro kon romanses ke guadravan los sefardim, para poder preservar esta rikeza muzikal. En este sigundo programa mos adentramos en el interesante Proyekto Sefardí de Kahn: Un Romancero kon el buto de resgatar los romanses más ermozos sefardim i ansí konservar este trezoro, vos damos informasiones de todo lo ke akontesió i kuando se puvlikó el livro de Romancero Sefardí. El buto de Kahn era editar este livro kon una seleksión de romanses sefardim i kon una chika introduksión istórika i demostrar a los sefardim de Oriente ke la República espanyola se topava kon interezo de sanar de algún modo las trájikas konsekuensias de la Inkizisión i la ekspulsión de los djudiós espanyoles en 1492. (Manaderos istórikos: investigasión de la prof Matilde Morcillo). Prezentasión del livro "Máximo José Kahn Nussbaum, los sefardíes de Grecia y la Legación de España en Atenas durante la Guerra Civil española" de la Profesora de Historia Contemporánea Matilde Morcillo Rocillo, komo omenaje a Máximo José Kahn, eskritor djudió de orijin alemán naturalizado espanyol, ke fue Diplomátiko en Grecia durante la guera civil espanyola, primero komo Cónsul del governo repuvlikano en Salónica entre 1937 i 1938. Indemás Kahn fue uno de los más destakados pensadores i eskritores djudiós del S XX. Grasias a Kahn 144 famyias de orijín sefardí de Salónica y Atenas pudieron salvarse del eksterminio nazi. I de estos romanses tan ermozos konservados por los sefardim kompartimos este romanse “Una matica de ruda” de Rodas, Grecia, ke interpreta la kantadera Fortuna, indemás sentimos el romance de bodas "Escogiendo Novia". Kurunamos el programa kon el kante "Yrme kero a Yerusshalayim" ke interpreta el Trío Sefarad. Sigundo Programa dedikado a Kahn. "Memoria del Holocausto, Shoá, presonajes salvadores de Sefardim de Grecia" Escuchar audio

See All (20)

About

La "Emisión Sefarad" es un programa kultural de radio, en lingua sefardí o djudeo-espanyol. Sefarad es uno de los nomvres de Espanya, i el sefardí es una lingua de baza medieval a la ke se adjuntan palavras de los dialektos i linguas de las sivdades onde los sefaradim moravan. Matilda i Rajel Barnatán, madre i ija, aparejan i prezentan las emisiones i sus kontenido por entero:entrevistas, presonajes, folklor i múzika de ancha diversidad, aktividades, tradisiones, literaturas i una lingüístika atada a la kultura ke tyene sus raízes en Espanya. Ansí "Emisión Sefarad" guadra el trezoro poétiko de los S X al XII en uno de los grandes patrimonios kulturales entregados a la umanidad. Ansiemzmo la kreasión kontemporánea arrebive en muestros días i atira el intereso de oyentes de diversos lugares i paízes. Viviana Barnatan (colaborador externo)

Information