Samoan Devotional

Open Heavens Samoa
  • 5.0 (5)
  • Christianity
  • Updated Daily

Lifestyle living. It is the Open Heavens devotional based on the Bible written by Pastor EA Adeboye and translated to the Samoan language.

  1. 2h ago

    Iloa lou faamoemoega (Discovering your purpose)

    OPEN HEAVENS MATALA LE LAGI MO LE ASO TOFI 17 SETEMA 2026 (tusia e Pastor EA Adeboye)   Manatu Autu: Iloa lou faamoemoega (Discovering your purpose)    Tauloto Tusi Paia: Ioane 8:12 “Ona toe fetalai atu lea o Iesu ‘iā te i latou, ‘ua fa‘apea atu, “O a‘u nei o le malamalama o le lalolagi; o lē mulimuli mai ‘iā te a‘u, e lē savali o ia i le pouliuli, ‘ae ‘iā te ia le malamalama o le ola.” Faitauga - Tusi Paia: Galuega 9:3-6 I le Kalatia 1:15 fai mai le Aposetolo o Paulo o le Atua na filifilia ma vala‘auina o ia a’o i le manava o lona tinā. Peitai e na te leiloa le fuafuaga a le Atua mo lona olaga seia oo ina feiloai ma Iesu i le Galuega 9:3-6, e pei ona tatou iloa i le faitauga mai le Tusi Paia o le asō.  E toatele tagata na soifua ma maliliu ae leiloa le faamoemoega na auina mai ai i latou e le Atua i le lalolagi. Mo se faataitaiga, e iai tagata e manatu na auina mai i latou e avea ma faiaoga peitai o le finagalo o le Atua e tatau ona avea ma suisui, ona latou ola pologa ai lava lea e aunoa ma le alualu i luma. Ao nisi, ua latou vave iloa le fuafuaga a le Atua mo latou olaga, ma agai pea i luma i le manuia.  Ae ou te lei feiloai ma Keriso, o lou faamoemoega ia avea au ma pule pito laitiiti o se Iunivesite i Aferika. Na ou manatu i lea taimi o le fuafuaga lea mo lo’u olaga. Sa manuia ma sologa lelei mea uma mo lea fuafuaga, ma i lo’u talavou, na amata ona ou sui ulu o le vaega o le matematika i se Iunivesite maualuga i Nigeria. Ua maea le faatalatalanoaga mo le avanoa o se polofesa i le Iunivesite, ma ua fuafuaina a tofia au, o le a amata ona ou faaaogaina le upu polofesa e faaopoopo i lo’u igoa ini nai masina, ae valaau loa le Atua ia te au ou te galue faafaifeau. E lei tofia au o se pule pito laitiiti o se Iunivesite i Aferika, peitai o le asō, e toatele pule o Iunivesite e valaau au o lo latou tamā. E ui e lei avea au ma pule o se Iunivesite, na amata faatuina e le Atua se Iunivesite e faaaogaina ai au, i le alofa tunoa o le Atua. Ou te tatalo mo oe i le aso, ia e iloa le fuafuaga a le Atua mo lou olaga, ma faataunuuina, i le suafa o Iesu.  Le au pele, o le mulimuli vavalalata ia Iesu, e pau lea o le auala e mafai ai ona e iloa le fuafuaga a le Atua mo lou olaga. A susulu lona malamalama ia te oe, e faasino oe i le ala e tatau ona e alu ai. Na iloa e Paulo le faamoemoega mo lona olaga aua na susulu atu ia te ia le malamalama o le Atua i le Galuega 9:3–6. Ae lei oo atu Lona malamalama, sa ola e ese mai fuafuaga a le Atua, e ui o loo manatu o loo ia faia le finagalo o le Atua. E iai tagata o loo agai pea i luga i a latou galuega e oo i totonu o le Ekalesia, ae o loo sesē le vaega. Seiloga lava e oo i le tumutumu faatoa iloa o loo latou galulue malosi i se vaega e lei valaauina iai i latou e le Atua. Ou te tatalo ia aua nei faapea le tala o lou olaga. Ia aua lava nei e galue i se vaega e elei valaau iai oe e le Atua, i le suafa o Iesu. Ia susulu atu le malamalama o le Atua ia te oe, ma taitai ia te oe, ma avatu le malosi e faataunuuina ai lana faamoemoega mo lou olaga, i le suafa o Iesu.  Tatalo Tamā, faamolemole taitai ma faasino a’u i le faamoemoega ua e saunia mo lou olaga ma aumai le malosi ia te au e faataunuu ai, i le suafa o Iesu, Amene.

  2. 1d ago

    Taitaiga Fou mai le Atua (Divine redirection)

    OPEN HEAVENS MATALA LE LAGI MO LE ASO LULU 16 SETEMA 2026 (tusia e Pastor EA Adeboye)   Manatu Autu: Taitaiga Fou mai le Atua (Divine redirection)    Tauloto Tusi Paia:  Luka 1:79 “e fa‘amalamalama ai i ē nonofo i le pouliuli ma le ata o le oti, e ta‘ita‘i i o tatou vae i le ala o le manuia.” Faitauga - Tusi Paia: Galuega 9:1-8 I le faitauga o le Tusi Paia i le asō, o se tamaloa e igoa iā Saulo mai Taso, o lē sa sauaina le Ekalesia a Keriso, sa agaʻi atu i Tamaseko e pu‘e faapagota tagata Kerisiano ma aumai i Ierusalema e faafalepuipui ai. Peita‘i, a’o agaʻi atu i Tamaseko, na faaali atu Iesu Keriso ia te ia, ua feliuaina ma maua se taitaiga fou mai le Atua. E sese le itu sa iai, i le sauāina o Kerisiano ma le galuega a le Atua i le lalolagi. Peita‘i, na afio mai le Atua ma feliuaina o ia ma taitai i le ala tonu. Ou te tatalo mo oe, afai e sese le ala o loo e agai atu iai i lou olaga, e mafai e le Atua Matautia ona feliuaina oe ma ta’ita’i i le ala tonu, i le suafa o Iesu. O Maria le Makatala o se isi tagata na feliuaina i le taitaiga a le Atua. I le Luka 8:2, ae leʻi feiloa‘i ma Iesu, sa sauaina e temoni e to‘afitu. E tasi le temoni e mafai ona faaleagaina le olaga ma le taunu‘uga o se tagata, ae e fitu temoni sa iā Maria. Sa faia e Satani se fuafuaga e faaumatia ai o ia, peita‘i na afio mai Iesu, feliuaina ma taitaia i se olaga fou. Na ia faasa‘olotoina o ia, ma na avea o ia o se tasi o ulua‘i tagata na vaai iā Iesu ina ua toetu mai. I le Ioane 20:13–18, na ia maua se feiloa‘iga mamalu ma le Ali‘i toetu, ua alu ma talai atu i ona soo, ua ia vaai i le Alii ma talanoa ma ia. O se fafine sa ulufia muamua e temoni, ua avea ma molimau faatuatuaina a le Ali‘i. Ou te tatalo ia e maua fo‘i se feiloa‘iga faapitoa ma le Atua. Ma afai o loo sesē le ala o e iai i soo se vaega o lou olaga, ou te folafola atu, o le a feliuaina ou ala ma taitai e le Atua i le ala tonu, i le suafa o Iesu. I ni tausaga ua mavae, sa matou faia ai se mafutaga faievagelia i Lagos. Sa iai se taule‘ale‘a o se sui o se vaega o tagata faomea faaaupegaina. Na sau o ia i le mafutaga ma se fana. Peita‘i, na taofia o ia e le Atua, ua ia tuuina atu lona ola ia Iesu Keriso ma ua ia lafoai le fana. I ni nai aso mulimuli ane, na fasiotia tagata uma o lana vaega i se osofaiga faagaoi. E lei iai lenei taule’ale’a I lea osofaiga aua ua fanaufouina. Sa i le itu sese, peita‘i na ia maua le malamalama o le Atua, ma ua lavea‘iina e le Atua mai le malaia. Le au pele e, afai o loo e savalia le ala sese i lou olaga i le taimi nei, ou te tatalo ia taofi oe e le malamalama o le Atua. Ou te tatalo ia afio atu le Atua e feliuaina ma toe ta’ita’i oe i lona mamalu, i le suafa o Iesu.  Tatalo Tamā, faamolemole asiasi mai ia te a’u i lou malamalama ma toe feliuaina a’u i soo se vaega o lo’u olaga o loo sese le ala o loo ou agai atu iai, i le suafa o Iesu, Amene.

  3. 2d ago

    O le Afi Maamaai (The Consuming Fire)

    OPEN HEAVENS MATALA LE LAGI MO LE ASO LUA 15 SETEMA 2026 (tusia e Pastor EA Adeboye)   Manatu Autu: O le Afi Maamaai (The Consuming Fire)    Tauloto Tusi Paia:  Teuteronome 9:3 “Ia e iloa fo‘i i le aso nei, o le ALI‘I lou Atua, o ia na te sopomua atu ‘iā te oe, o le afi ma‘ama‘ai o ia, na te fa‘aumatia i latou, na te fa‘ato‘ilaloina fo‘i i latou i ou luma; ‘e te tulia fo‘i i latou, ma vave fa‘aumatia i latou, fa‘apei ‘ona fetalai mai o le ALI‘I ‘iā te oe.” Faitauga - Tusi Paia: Numera 11:1-3 Ua ou maua avanoa taua e vaai ai i le galue mai o le Atua i le tele o taimi, ma ou te matuā alofa moni ia te ia. E lē gata i lea, e tatau ona ou ta’u atu, ou te matua mata’u ia te ia. Ou te iloa e iai nisi popoto o le Tusi Paia e fai mai e tatou te lē ono matatau i le Atua, ae e tatau ona tatou ava ia te ia. Peitai o se tasi o itu matautia o le Atua, o ia o le Afi Maamaai ( Teuteronome 4:24, Eperu 12:29). Fai mai toeaina o Aferika e oo i se taifau feai, e fefe i le afi. O le mafuaaga lea e lē tatau ai i se tagata ona ula i le Atua, aua a taalo se tagata ma le afi, e ono mu ai.  O se tasi o vaega matagofie i le avea o le Afi Maamaai ma o tatou tamā, o le Afi lea e pei o se pa e puipui i lana fanau ma faaumatia o latou fili i le taimi e tasi. Fai mai le Sakaria 2:5, o le Atua o se pā afi e si‘osi‘o a‘i ona tagata, e fai fo‘i o ia ma pupula i le ogatotonu o i latou. I le Esoto13:18-22, ina ua taitaiina e le Atua le fanauga a Isaraelu mai Aikupito, ua afio le ALI‘I i o latou luma i le ao fa‘aniutū i le ao, a o le afi fa‘aniutū i le po. E ui o le afi faaniutū na faamalamalaina, faasino ala ma faamafanafana ai lana fanau, fai mai le Esoto 14:24-25, na silasila atu le Atua ia Aikupito i le afi lava e tasi. E lei alu ese le afi faaniutū seia oo ina saofia ma le saogalemu le fanauga a Isaraelu i leisi itu o le sami ulaula, ao latou fili, na faaumatia uma i lea aso. I le tauloto mai le Tusi Paia o le asō, na faatonu e Mose le fanauga a Isaraelu, ia malamalama ua afio muamua atu le Atua o le Afi Maamaai e faaumatia o latou fili. Ou te tatalo mo oe i le asō, i le suafa e sili i suafa uma lava, ia faaumatia e le Afi Maamaai soo se maa faalavelave i ou ala, i le suafa o Iesu.  Ou te faailoa atu foi se lapataiga, e ui o le Afi a le Atua e faaumatia ai, e lē mo lana fanau, peitai e mafai ona latou aafia ai pe afai e faataga le agasala i o latou olaga. I le faitauga mai le Tusi Paia o le asō, sa tatau ona vivii ma faafetai le fanauga a Isaraelu i le Atua ao iai i le vao, ae ua tomumumu, ona paū mai lea o le Afi o le Atua ma faaumatia nisi o i latou. Le au pele e, alo ese ma le agasala e aofia ai le tomumumu ma le faaseā. Ia tuuina atu lou tagata e ola faapaiaina (1 Peteru 1:16), ma i mea uma lava, faafetai i le Atua mo lona finagalo mo oe.  Tatalo Tamā, faamolemole fesoasoani mai ia te au ia ou ola e saoloto mai le agasala ae tumu i le faafetai, i le suafa o Iesu, Amene.

  4. 3d ago

    E muamua le faamaualuga i le paū 2 (Pride comes before a fall 2)

    OPEN HEAVENS MATALA LE LAGI MO LE ASO GAFUA 14 SETEMA 2026 (tusia e Pastor EA Adeboye)   Manatu Autu: E muamua le faamaualuga i le paū 2 (Pride comes before a fall 2)    Tauloto Tusi Paia:  Luka 14:11 “Auā soo se tasi e fa‘amaualuga o ia ‘iā te ia lava, e fa‘amaulaloina lea; a o lē fa‘amaulalo e ia ‘iā te ia, e fa‘amaualugaina lea.” Faitauga - Tusi Paia: Esekielu 28:12-19 E iai sa’u uo o se faamasino e ese le poto. E mafana le ma mafutaga, ae e iai lona vaivaiga, e faamaualuga. I le tele o tausaga talu ai,  ao ou malaga atu i se tasi nuu ae ou vaai atu o sau i fafo ma le vaalele o le a ou malaga ai, e toalua tagata i ona autafa, e toatasi i le itu taumatau ma leisi i le itu tauagavale. Na ou savali atu iai e faafeiloai, ae tilotilo mai ma faapea mai, ‘O ai lea?’ Na ou tali atu, ‘Malo, o a’u o Adeboye, lau uo’. Ona musumusu mai le o se tasi tagata o loo i ona autafa ia te a’u, ‘ua lē toe manatua se mea’. Fai mai, ua ia lē toe manatuaina poo ai ia e oo i lana fanau ua lē toe iloa. Ua faafuasei ona aveesea mea uma.  O soo se tagata e faataga le faamaualuga i lona loto, e tutusa lelei le mea e oo iai e pei o le tiapolo. Fai mai le faitauga o le Tusi Paia o le asō, sa ia te ia le poto atoatoa ma le matagofie tele faapea ma ona ala uma seia oo ina iai le amioleaga ma le agasala ia te ia. Ua faaalia le agasala i le fuaiupu 17, na fa‘amaualugaina lona loto i lona matagofie; ‘ua fa‘amaumau lona poto ma lona matagofie. Sa ia te ia le faamaualuga, ma e faapena foi ona oo atu ai i le toilalo ma paū.  E finagalo le Atua e faasoa atu lona poto ma le maoae i tagata, ae o le tele o taimi, e lē umi ona iai tagata i tulaga maualuluga e tuuina iai e le Atua, ona o le faamaualuga. O loo faailoa mai e le Isaia 14:12-19 le ala na faamaualuga ai Lusifelo, na manao e viia o ia e sili atu i le Atua. E iai se auala e tasi e te iloa ai poo e faamaualuga pe leai. A oo i le tulaga ua e faamuamua lava oe, o mea ua e ausia, o mea e mafai ona e faia, o le tulaga e te sili atu ai i isi tagata, o auala e tatau ona faaaloalo ma ava atu ai tagata ia te oe, o lona uiga ua iai le faamaualuga i lou loto. Afai o le tulaga lena ua e iai, salamo vave, aua o le faamaualuga e tasi lona faamoemoega i le olaga o se tagata, ia faapaū i lalo ma ia toilalo (Faataoto 16:18).  Le au pele e, e tatau ona e manatua, e iai le Atua e mafai ona faaeaina oe ma toe faapaū oe i lalo. E tatau foi ona e iloa, e lē o le malosi o le tagata e mafai ai ona faaauau. Fai mai le Auega 3:22, o le alofa o le ALI‘I ‘ua lē fa‘aumatia ai i tatou, ‘ona ‘ua lē mavae o lona alofa mutimutivale. O loo e soifua ma ou ola i le asō, ona o le alofa mutimutivale o le Atua. A e faamaualalo, e avatu e le Atua ia te oe le alofa tunoa. A e faamaualuga, e tetee le Atua ia te oe (Iakopo 4:6). O le filifiliga o loo ia te oe. Filifili ma le poto. Filifili le faamaualalo ae tetee i le faamaualuga, i le suafa o Iesu, Amene.

  5. 4d ago

    E muamua le faamaualuga i le paū 1 (Pride comes before a fall 1)

    OPEN HEAVENS MATALA LE LAGI MO LE ASO SA 13 SETEMA 2026 (tusia e Pastor EA Adeboye)   Manatu Autu: E muamua le faamaualuga i le paū 1 (Pride comes before a fall 1)    Tauloto Tusi Paia: Salamo 10:4 “O le fa‘asiasia o mata o lē ‘ua amio leaga e lē sā‘ili ai o ia; o ona mafaufau uma, “E leai se Atua.”” Faitauga - Tusi Paia: Tanielu 4:29-37 Na faia e le Atua Nepukanesa o se tupu maoae, peitai na oo atu le faamaualauga i lona loto, ona ia amata lea ona faalialia vale mea, na manatu na ia faia i lona malosi. Na lapatai e le Atua o ia, ia faaeteete ma ia faia mea tonu(Tanielu 4:1-27) peitai e lei faalogo i le fautuaga. Na ala ae i se tasi taeao ma amata ona faalialia le faamaualuga ma faapea, “E lē o Papelonia tele ‘ea lenei, na a‘u faia i lo‘u i lo‘u malosi tele lava, e fai ma fale o le mālō, ia vi‘ia ai fo‘i lo‘u mamalu?” Na silasila mai le Atua mai le lagi ma faapea, ‘ua lelei tupu maoae, o le a ou aveesea oe mai lou malo, alu atu ia e ola ma meaola i le fanua mo le fitu tausaga. Aai pei o latou, foliga pei o latou ona iloa lea poo ai moni e pule’. I le taimi lava lea, na alu ese ai lona malamalama ma ua ola ma meaola i le fanua. Ina ua mavae le fitu tausaga, i le alofa mutimutivale o le Atua, na toe faafoisia lona malamalama, ua ia vivii i le Atua maualuga. Fai mai le Tanielu 4:34 “‘Ua uma ia aso, ‘ona ‘ou fa‘asaga a‘e ai lea o‘u mata i le lagi, o a‘u o Nepukanesa, ‘ona a‘u toe atamai ai lea; ‘ona ‘ou fa‘afetai ai lea i lē Silisili‘ese, ‘ua ‘ou fa‘ane‘ene‘e atu fo‘i ma vivi‘i atu ‘iā te ia o lē soifua e fa‘avavau, O lana pule o le pule e fa‘avavau lea, o lona mālō fo‘i e āu tupulaga lava lea.” O le taimi lava na ia tautino ai o le Atua mualuga o Le e iai le pule aoao, o le mamalu o lana nofoaiga ua toe faafoisia ia te ia. “O ona po lava ia na ‘ou toe atamai ai; ‘ua toe fo‘i mai ‘iā te a‘u lo‘u mamalu ma lo‘u matagofie, ‘ina ‘ia mamalu ai lo‘u mālō o ‘ou tulafale fo‘i ma ali‘i sa ‘iā te a‘u, ‘ua latou sā‘ili ‘iā te a‘u, ‘ua fa‘atumauina fo‘i a‘u i lo‘u mālō, ma ‘ua fa‘aopoopoina mai ‘iā te a‘u le mamalu e tele.” (Tanielu 4:36).  Fai mai le Roma 1:28, “‘Ua latou lē loto fo‘i e tāofi i le matā‘upu i le Atua, o lea ‘ua tu‘uina atu ai i latou e le Atua i le loto leaga, latou te fai ai mea e lē tusa;” Afai e teena e tagata e tautino le mana, matautia ma le pule a le Atua i mea uma o le lalolagi, e amata ona amio e pei o ni manu. Mo se faataitaiga, ua tatou vaai i tane ua taua i latou o fafine, ma ua oo ina faia taotoga faapitoa ina ia foliga ai o ni fafine, e faapena foi i fafine ua fia foliga e pei o tane. O tagata e faia ia ituaiga amioga, ua latou lē loto e taofi i mataupu a le Atua ma ua tuuina atu e le Atua e latou te faia mea e lē tusa.  Le au pele e, tautino le Atua i ou ala uma ma aveese le faamaualuga. O i latou e faataga le faamaualuga i soo se ituaiga i o latou loto, ua latou tuuina atu avanoa i le tiapolo e faaumatia i latou. O le faamaualuga e tuua i lalo tagata ma ua pei ai o latou manatu ma amioga o ni manu, i le suafa o Iesu, Amene.

  6. 5d ago

    Aua e te fiu e taumafai pea 2(Never give up 2)

    OPEN HEAVENS MATALA LE LAGI MO LE ASO TOONAI 12 SETEMA 2026 (tusia e Pastor EA Adeboye)   Manatu Autu: Aua e te fiu e taumafai pea 2(Never give up 2)    Tauloto Tusi Paia:  2 Korinito 4:1 “O le mea lea matou te lē fa‘avaivai ai, o i matou ‘ua i ai lenei faiva, ‘ina ‘ua alofaina i matou;” Faitauga - Tusi Paia: Isaia 40:27-31 O ananafi na o’u faamalosi ai ia te oe aua e te fiu e taumafai pea i au miti mai le Atua. O le asō ou te mana’o e faailoa ia te oe tusa pe foliga mai ua lē mafai ona ausia au miti, e mafai e le Atua ona toe faaola ma fa’afo’isia i latou e ala i lona alofa mutimutivale.  I le Mataio 4:19; na folafola e Iesu na te faia Peteru ma fai faiva o tagata pe afai e mulimuli atu ia te ia. Na mulimuli Peteru ia Iesu mo le tolu ma le afa tausaga, peita’i ina ua uma le fa’asatauroina o Iesu, na toe fo’i fagota. Faafetai ia Iesu Keriso i lona alofa mutimutivale e le gata, na ia asiasi ia te ia e pei ona tusia i le tusi o Ioane 21:15-17 ma toe fa’afo’isia ia i le ala i lona taunuuga ma fetalai atu ia te ia, “Peteru fafaga a’u mamoe.” Ona oo lea i le aso Penetekoso e pei ona fa’amatalaina i le Galuega 2:1-4; na afio ifo Agaga Paia i luga o Peteru ma isi sa faatasi ma ia, ma liua le tagata faifaiva faiaina e faafuasei ona avea ma se tasi na manumaloina agaga e 3000 mo Keriso i le lauga e tasi (Galuega 2:41). E le’i umi, ae tautala le Peteru lava lea ma le loto toa i ta’ita’i o le nuu (Galuega 4:8-13), ma o lona ata lafoia na malolo ai e mama’i (Galuega 5:15-16). Afai na mafai e le Atua ona toe fa’afo’i Peteru i le ala e faataunuuina ai lona valaauina, e mafai fo’i ona Ia faia i soosetasi ua fiu ma lē toe mana’o i lana miti.  I nisi taimi o o tatou olaga, tatou te lagona uma le vaivai ma le lē toe fia i ai. Ua o’u maitauina fo’i e tele ina maua tagata i le lēlavā ma masani ona faaosoosoina ai e togi le solo ina ua toe o se aga taunuu manuia a latou miti. Aua le faatagaina le vaivai poo so’ose ituaiga faaosoosoga e faaoso oe e lafoa’i au miti. I taimi faapea tagi atu i le Atua mo lona alofa mutimutivale e sapaia oe ma fesoasoani ia aua ne’i e fiu e taumafai pea. Fai mai Isaia 40:29; Na te avatua le malosi i e ua vaivai; ao e ua leai se malosi na te faatupu tele i ai le malosi. I le 2 Korinito 4:1; Fai mai Paulo, faapei ona alofaina i matou, matou te le faavaivai ai o i matou ua i ai lenei faiva. O le alofa mutimutivale e mafaia ona tausia ma uumau oe mai lou fulitua I mea uma na e galue punoua’i ma tautigā ai, ua toeitiiti e taunuu i lou manuia. Aua lava ne’i tu’u avanoa i le vaivai e manumalō ia te oe. O le vaivai ma le lēlavā na tatā’ia Esau e tia’i lona tofi ulumatua (Kenese 25:29-34) ma o loo pa’uū pea le toatele i lenei filifiliga sesē taugata i aso nei.  Le au pele e, o e faaalogoina le faavaivai ma ua sauni e faamuta le taumafai? Tagi i le Atua mo lona alofa mutimutivale. Ole ia te ia mo lana ta’ita’iga, faasinoga, malosi ma le fesoasoani uma e te manaomia e faataunuu ai lona finagalo mo lou olaga. O lona alofa mutimutivale o le a siitia oe seia taunuu i le manuia, i le suafa o Iesu.  Tatalo  Tamā faamolemole auina mai lou mana e fa’amalosia ma unaia a’u aua ne’i fiu e taumafai pea, i le suafa o Iesu Amene. folafolaga ua ia avatu ia te oe, ma faaauau ona e mulimuli i lana taitaiga, e na te faataunuuina au miti e tusa ma lona finagalo i le suafa o Iesu. A e tumau pea i le faatuatua ma aua ete fiu i le taumafai e ausia miti ua tuuina atu e le Atua ia te oe, e oo lava ona taunuu, i le suafa o Iesu, Amene.

  7. 6d ago

    Aua e te fiu e taumafai pea 1 (Never give up 1)

    OPEN HEAVENS MATALA LE LAGI MO LE ASO FARAILE 11 SETEMA 2026 (tusia e Pastor EA Adeboye)   Manatu Autu: Aua e te fiu e taumafai pea 1 (Never give up 1)    Tauloto Tusi Paia:  Faataoto 23:18 “auā ‘āfai o i ai le i‘uga, ‘ona lē i‘uvale lea o lou fa‘amoemoe.” Faitauga - Tusi Paia: Kenese 41:37-44 O Iosefa o se faataitaiga lelei o se tagata e lei fiu e taumafai pea, e ui na matuā faigata luitau na ui ai. I le Kenese37:5-23, na miti ini miti maoae, ma ina ua ia faasoa atu i ona uso, ua latou lē fiafia ona ua lu’i ai i latou. Ua latou pulepule e fasioti ia te ia peitai na iu ina malilie e faatau atu o se pologa. E lei taofia ai Iosefa. Na ia iloa lelei ua saunia se lumanai maoae mo ia, o lea na ia galue malosi ai seia oo ina avea ma taitai i ē pologa. Ona taumafai lea o le toalua o lona matai e faatosina ia maileia o ia, ae na ia teena ona e lē manao e faatupuina le toasā o le Atua, o Lē na ia foai atu ia te ia miti maoae ( Kenese 39:9). Ua ia iloa, a ia lē faatupuina le toasā o le Atua, e mafai ona taunuu ana miti. Mulimuli ane, ua tuuaia pepelo o ia e le toalua a lona matai, ma ua faafalepuipuiina, ma oo ai foi ina avea ma taitai o pagota. Na maea le tele o tausaga, ua faaeaina e le Atua mai le pagota i le tulaga o le Palemia o Aikupito i le aso e tasi. E na o sina gaoioi mai lava o le Atua, ona taunuu lea o ana miti. Afai na faaeaina e le Atua se pagota i se tulaga maualuga faapea, e mafai foi ona ia avea oe i soo se maualuga e te naunau iai.  I le 1981 ina ua avea au ma taitai aoao o le Ekalesia RCCG, na ou asiasi atu i se tasi o Ekalesia. I le taimi o au asiasiga, na sau se tina i a matou polokalame ae ua maea, ona na manatu e faia i le afiafi. E sau ua ou alu ese, ona faapaū lea i lalo ma tagi tautala e faapea, ‘Le Atua e, o lea la ua ou iloa e te lē finagalo e maua sa’u tama’. Ua fai ia te ia lava, e pau le mea na te manaomia o le vaai i le tagata o le Atua, ona mafai lea ona maitaga. Ina ua fesili iai tagata pe aisea ua tagi ai, ona ia faamatala lea faapea, na tau lea iai e tagata le nofoaga o le a ou iai i le aso e sosoo ai. O le aso na sosoo ai, na sau i le nofoaga na ou iai, ma o le taimi na ou tulai ai ou te lauga, na tilotilo mai ia te a’u ma faapea, ‘Le Atua e, faafetai’. O le masina lava lea, na maua ai i le maitaga aua na pai atu i le Atua lona faatuatua. E lei fiu e taumafai pea i le mea o loo manao iai.  Le au pele e, aua e te fiu e taumafai. O le Upu a le Atua ia te oe, e taunuu. Afai e te uumau pea i le folafolaga ua ia avatu ia te oe, ma faaauau ona e mulimuli i lana taitaiga, e na te faataunuuina au miti e tusa ma lona finagalo i le suafa o Iesu. A e tumau pea i le faatuatua ma aua ete fiu i le taumafai e ausia miti ua tuuina atu e le Atua ia te oe, e oo lava ona taunuu, i le suafa o Iesu, Amene.

  8. Sep 9

    Faaeaina saosaoa ma le maoae (Accelerated and extraordinary promotions)

    OPEN HEAVENS MATALA LE LAGI MO LE ASO TOFI 10 SETEMA 2026 (tusia e Pastor EA Adeboye)   Manatu Autu: Faaeaina saosaoa ma le maoae (Accelerated and extraordinary promotions)    Tauloto Tusi Paia: 1 Korinito 1:26 “Ia ‘outou mānatunatu i lo ‘outou vala‘auina, le ‘au uso e; e lē to‘atele o ē popoto e tusa ma le manatu o lenei lalolagi, e lē to‘atele faipule, e lē to‘atele ali‘i.” Faitauga - Tusi Paia: Iosua 1:1-9 O le upu ‘faifeau’ i aso anamua e faasino i auauna e tamoe solo e fai feau a lona matai. O ia feau e aofia ai le fufulu ma faamāmā le potu a lona matai, fai le tagamea a lona matai, fufulu ona vae ma faia isi feau faapena.  Ao soifua Mose, sa faifeau ai Iosua, e te malamalama ai i le matua faateia o Iosua ina ua faailoa iai e le Atua o le a tofia o ia e avea ma taitai o Isaraelu ina ua faasalaina lona matai. O se faataitaiga lea o le faaeaina e saosaoa ma maoae. Na matua faafuasei le faaeaina e oo ia Iosua ua fememeai i le avega mamafa o matafaioi o le taitai. Ou te iloa lea tulaga aua i le faitauga mai le Tusi Paia o le asō, e faatolu ona fai le Atua ia Iosua ia faamalosi ma loto toa. Ou te folafola atu i le asō, ia faaeaina oe e le Atua faapea.  A ou vaai nei i tagata o loo pologa i le taumafai mo le faaeaina ma manaonao ia oo i tulaga pule, ou te iloa aua latou te lē malamalama i ala o le Atua. E lē avea e le Atua le faaeaina saosaoa ma le maoae i ē popoto ma agavaa. E na te lē foaia i tagata e manatu maualuga i lo latou agavaa e pei i le faamatalaina o saisailiga faasaienisi i ni pepa o aoaoga. E masani ona filifilia e le Atua mea vālea ma mea vaivai a le lalolagi e fa‘amāina ai ē popoto ma mea malolosi (1 Korinito‬ ‭1‬:‭27‬). O lona uiga, o tagata e manatu e malolosi ma popoto e mafai a e latou ona faaeaina, e lē tatau ona latou manatu e maua mai le faaeaina saosaoa ma le maoae mai le Atua, aua foi na o i latou e lē faoina le viiga o le Atua e na te tuua iai.  I le aso na ma faaipoipo ai ma la’u avā i le malō, na ma fetaui ai ma se tamaitai o loo fai lona ofu faaipoipo. Peitai e leai se tama faaipoipo, ua tiai e le tama i le aso o le faaipoipoga. Na toe a valea si tamaitai peitai na toe foi i lona tulaga masani. Ina ua maea sina taimi, ua ia faaipoipo atu i se fitafita. E na te leiloa o le tama lea na tiai o ia i le aso o le faaipoipoga, ua ulufale atu foi i le malosi faafitafita. Ona galue lea o le Atua. Na tupu se fouvale a le malosi faafitafita, ma ua filifilia le toalua o le tamaitai e avea ma taitai o le malo. E uma ane, ua tofia le tama lea na tiai o ia, e fai ma faafeao a le taitai o le malo. O lona uiga, o soo se taimi e ulu ai lenei tamaitai i le taavale, o le tama lea na ia tiaia o ia, e na te tatalaina le faitotoa mo ia, le toalua o le taitai o le malo.  Le au pele e, ou te folafola atu i le asō, o le a faasaosaoa e le Atua lou faaeaina, ma o i latou uma o loo taliē ma ula ia te oe, o le a faamāina, i le suafa o Iesu. E faasaosaoina e le Atua  le faaeaina e nā o i latou e lē faoina lona viiga, i le suafa o Iesu, Amene.

See All (1.6K)

Ratings & Reviews

5
out of 5
5 Ratings

About

Lifestyle living. It is the Open Heavens devotional based on the Bible written by Pastor EA Adeboye and translated to the Samoan language.

Information

  • Creator
    Open Heavens Samoa
  • Years Active
    2022 - 2026
  • Episodes
    1.6K
  • Rating
    Clean
  • Copyright
    © 2026 Samoan Devotional
  • Show Website
    Samoan Devotional