RTL - 5vir12 RTL Lëtzebuerg

Summer wéi Wanter, mat Lockdown oder ouni, an ganz egal wéi en amerikanesche President um Rudder ass, bréngen si eis op de leschte Stand. Si kucken net nëmmen zréck, mä hunn och den Duerchbléck a kennen d'Zukunft, dat behaapten si selwer. Lëschteg gëtt et allemol all zwou Wochen mam Lucien Czuga, Al Ginter, Jacques Kapp a Gérard Valerius déi op Distanz mam Christiane Kremer debattéieren an de Spunnes maachen.

Déi Kéier wier et besonnesch einfach gewiescht dat vergaangent Joer auseneen ze huelen, an a vill kleng eenzel negativ Puzzelstécker ze zerleeë. A wat maachen si? Se huelen den décken Hummer fir eemol net eraus, mä sichen no deene positiven Elementer aus dem Joer 2020. Och déi gouf et.
Beim Christiane Kremer gëtt Bilan gezunn, zesummen mam Al Ginter, Jacques Kapp, Lucien Czuga a Gérard Valerius. Awer net wéi soss an der grousser Ronn, mä jiddereen eleng vu sech Doheem.

Well ee sech de Moment net sou dacks gesäit, huet ee sech noutgedrongen och méi ze verzielen. An dat wäert bei deenen heiten 5 net aneschter sinn, déi sech elo no 2 Wochen Radiosabstinenz nees erëmhéieren fir iwwer Gott an d'Welt awer och Corona a Brexit ze schwätzen. d'Christiane Kremer huet geruff an bäigeschalt vun doheem sinn den Al Ginter, Jacques Kapp, Lucien Czuga a Gérard Valerius.

Haut op Kleeserchersdag gëtt et och bei där heiten Band allméiglech Iwwerraschungen. Si deelen am Groussen aus. Fir déi eng gëtt et eppes Séisses an déi aner dierfe sech op eng Rutt gefaasst halen. Wéi déi lescht Wochen och sëtze se nees am Pyjama oder Jogging doheem an réckelen hiert Weltbild nees richteg wéi et hinne gefält. Vun Trump bis Corona, vun Wantersport bis bei de lëtzebuerger Haff misst et bis 12 Auer nees queesch derduerch goen mam Al Ginter, Lucien Czuga, Jacques Kapp a Gérard Valerius.

Keng Zopp ass hinnen ze waarm, kee Wee ze weit a kee Präis ze héich fir sech iwwer d'Aktualitéit lëschteg ze maachen. Si kucken zréck op déi lescht 14 Deeg a kieren och ënner den Teppech wann et muss sinn. De Biesemsstill am Grapp hunn bei sech doheem den Al Ginter, Lucien Czuga, Jacques Kapp a Gérard Valerius.

Si huelen kee Blat vrun de Mond a Mask brauche se och keng well si sëtzen op Kilometeren auseneen am Home-Studio fir op déi déck Tromm ze fachen. Un alles sinn se interesséiert op Heiheem vun der Dier oder iwwer dem grousse Pull an ëmmer nees kënne se sech an den Äifer rieden. Beim Christiane Kremer bäigeschalt sinn den Jacques Kapp, Al Ginter, Lucien Czuga a Gérard Valerius.