【A郎】台語廣播劇 EP. 08 彼年ê熱天，完美ê一球！台語白話字 Tâi-gí POJ (Pe̍h-ōe-jī)

A郎ê冒險故事，希望ta̍k-ke聽tio̍h ē kah意，mā真ǹg望ta̍k-ke鬥紹介hō͘親chiâⁿ朋友做夥來聽故事！

[官方網站 Koaⁿ-hong bāng-chām]
https://cho-kang-a-lang.github.io/

[Podcast]

SoundOn
https://bit.ly/ChKaL_SO

Spotify
https://spoti.fi/48jD2tI

KKBOX Podcast
https://bit.ly/ChKaL_KK

Apple Podcast
https://apple.co/3HZyfD3

Google Podcasts
https://ppt.cc/fpPKUx

YouTube Podcast
https://bit.ly/ChKaL_YT


[社交平台 Siā-kau Pêⁿ-tâi]

YouTube
https://bit.ly/ChKaL_YT

Facebook
https://bit.ly/ChKaL_FB

Instagram
https://www.instagram.com/chokangalang/

X (Twitter)
https://twitter.com/chokangalang

方格子
https://vocus.cc/salon/cho-kang-a-lang

以下是故事ê漢羅kah白話字原稿，有需要ē-tàng參考。

【漢羅版】
3 ê人沿路開講沿路行，A郎問講：「雉雞姊，看你嘴笑目笑，心情bē-bái hōⁿ？」應講：「Hèⁿ ā！Hâm lín做夥旅行，kài sêng koh轉去到少年時無煩無惱ê日子，goán爸母早早to̍h過身，我真早to̍h ài phāiⁿ hit間店ê責任。觀前顧後，看頭看尾，項項mā tio̍h斟酌。」A明接落去講：「莫怪你chit-má表情hiah輕鬆！」雉雞姊koh應講：「是ā，iáu koh好順祥chêng goán爸母過身，to̍h一直tī我seng-khu邊tàu-sio-kēng，mā是有伊，我chit-má chiah走ē開脚。Lín koh來叫我A鳳to̍h好，he是我ê本名。」A明問講：「Án-chóaⁿ ē有雉雞chit ê偏名？」應講：「我gín-á時，飼1 chiah雉雞，真súi，kui kang to tòe前tòe後，真乖。歹gín-á nā beh kā我kāng，伊to̍h ē去ka啄，久--來，開始有人叫我雉雞，koh來to̍h hông叫tiâu--leh-ah。」A郎笑笑講：「白目gín-á hông tok應該。」Chiū án-ne kui路笑聲無停。
Koh án-ne繼續順大路一直行--落-去，4 kang後，3 ê人來到1 phiàn闊bóng-bóng ê平洋，草hoat kah真旺，有1 tīn鹿á tī草埔á teh食草，tú好chah--出-來ê食mi̍h mā食kah差不多，A明講：「咱tio̍h phah 1隻鹿á來食，順sòa mā做1 kóa肉干，後1 ê庄頭m̄知koh ài jōa遠chiah ē到，hō͘我chit ê軍師來想看有siáⁿ-mih妙計--bô，ta̍k ê sió等--1-ē。」話猶未講soah，A郎木刀已經poe̍h--出-來，準備beh衝過去phah鹿á。Chit chūn，A鳳soah tī路邊khioh 1粒圓圓ê石頭，雙手ka so-so--leh，tēⁿ-tēⁿ--leh，koh用手sìm--leh sìm--leh chat輕重，到伊感覺滿意，正手kā石頭tēⁿ ho͘ tiâu，bún笑--1-ē，kéng 1隻鹿á，siòng ho͘真真，sòa--落-來倒脚gia̍h koân過頭，ùi hit隻鹿á ê方向，大步出力 hiòng前緊mé踏--出-去，正手mā tòe脚步踏hiòng前ê勢，ná 1條鞭tùi鹿á sut--出-去，一直sut到盡磅，石頭離手，ná箭離弦，ná暝時流過天邊ê流星，tī空中畫1 chōa真súi ê khiok線，準準khian tio̍h鹿á頭，鹿á ê頭殼tòe leh hàiⁿ--1-ē，seng-khu khi 1 pêng，phiăng--1-ē，直直倒tī土脚bē-tín-bē-tāng，A郎看kah嘴á開開bē曉合，A明mā看kah m̄知影thang想妙計。

其實石頭離手ê時，A鳳已經知影石頭ē án-chóaⁿ飛，che是m̄知已經練習過幾千遍chiah調整到完美ê動作，kah hit年熱--人hit球離手ê感覺lóng sio-siāng。完美ê投球，siāng蹧躂人ê球路，目睭tòe bē tio̍h ê球速，無tè嫌ê 1球。球khian--出-去，歡喜kah，心內喝講「穩--ah」，無張無tî，「khng」1聲，球飛kah koh koân koh遠。Hit年ê熱天，對A鳳來講，to̍h án-ne結束--ah。
Phah tio̍h鹿á了後，3 ê人分工無閒，抾柴起火，剝皮，處理鹿á肉，一直到黃昏，無時停ê khang-khòe chiah結束，3 ê人chiah有閒kang thang圍tī火邊食暗。暗頓是鹿á肉kah腹內khòng菜蔬ê湯，3 ê人ná o-ló好食ná開講，A鳳mā ta̍uh-ta̍uh-á kā A郎in講伊phah鹿á ê工夫是án-chóaⁿ ē-hiáu--ê。Tang-sî-á是A鳳--ā in庄--ni̍h，ta̍k年熱--人神明seⁿ，to̍h ài ngiâ鬧熱，神明ē繞境保庇四方信徒，消災解厄。人人ài備辦好酒好菜敬拜神明。Mā m̄知是tang時開始，有人建議ài辦野球比賽，講是beh hō͘節日koh khah鬧熱，che比賽有限制是15 kàu 17歲ê少年gín-á chiah ē-tàng參加，to̍h是為tio̍h beh鼓勵gín-á-lâng訓練體能，尾--á，庄--ni̍h ta̍k ê真認同，野球比賽變kah chiok時行，家家戶戶lóng真熱情參與，nā厝--ni̍h有夠歲ê gín-á，to̍h ē送in去球隊練球。頭起先人無夠，kan-na ē-tàng hun做2隊phah，尾--á，jú來jú chē人來參與，變做8隊，比賽mā變做ài比3 kang，ta̍k隊to想beh piàⁿ頭名。「教練看我球khian了bē-bái，選我做投手，15歲hit年，the̍h tio̍h第4名，16 the̍h tio̍h第3名，到我17 hit年，想beh piàⁿ冠軍，練球練kah無暝無日，結果mā是the̍h tio̍h第2名niâ…。」A鳳teh講chit段往事ê時，有時嘴笑目笑，有時sàm淡稀微，凡勢che to̍h是青春ê滋味。
3 ê人ná食ná配話，hi-hi-hōa-hōa，心情輕鬆，tú tio̍h--á to̍h ài斟酌hang肉干ê火，溫度ài有夠koh bē-tàng siuⁿ iām。A鳳講：「咱鹿角mā ē-tàng chah--leh，到後1 ê庄頭ē-tàng the̍h去賣，凡勢nā chhōe tio̍h工夫老到ê司傅，koh ē-tàng請伊khek薰吹，刻1 ki A鳳ê鹿角薰吹來pûn風。」等到ta̍k ê食飽家私款好勢，to̍h chhun肉干ài koh顧，thèng-hāu肉干處理好，時間已經kài òaⁿ，3 ê人chiah soah鼓去睏。

隔轉kang 3 ê人kāng款一直順大路行--落-去，to̍h án-ne iû-koh過3日。第4 kang行到beh晝á，開始鼻tio̍h海風鹹鹹ê味，3 ê人知影已經離海邊kài近，斟酌ka看，頭前mā看tio̍h都市，應該脚步koh sió chhui--1-ē to̍h thang好chhōe tio̍h客店歇睏。行--leh行--leh，無jōa久to̍h行到位。去kâng探聽了後，知影chit ê都市號做港都，在地ê人主要是出海lia̍h魚，賣魚，行船載貨做進出口，koh有鹹水貨ê大小賣，市內三脚步一坎店，kài chē間店lóng有kha-siàu tī店門口teh喝聲kho͘人客，人客nā óa--過，mā隨有kha-siàu過來chih-chiap招呼，實在真鬧熱。

3 ê人第1遍來到港都，當然mā是chia看hia看，項項hòⁿ-hiân，件件sĭn-sián，in想想--leh，kui-khì好好á ka觀光--1-ē，sńg ho͘夠khùi chiah phah算，3 ê人to̍h án-ne一直到se̍h，se̍h kah thiám--ah，chiah開始感覺腹肚iau。A鳳講：「Tú-chiah看--tio̍h ê hit間海產餐廳人客插插插，無咱來去ka交關--1-ē siáⁿ款？」A明真緊張，趕緊講：「Ài ē記得先問價siàu！」A鳳應講：「免驚--lah，我請！Mài煩惱！」A郎kah A明koh想tio̍h進前tī A鳳hia做工tú siàu ê tāi-chì，心內歹勢歹勢，m̄敢應好，khiā--leh無tín-tāng，A鳳koh chhui，2 ê人chiah gī--leh gī--leh tòe A鳳後壁行。餐廳出菜kài緊，料理ê手路mā真講究，無jōa久3 ê人to̍h食kah飽thong-thong，有影是料理好食，人客chiah ē chē kah that倒街！食飽，A鳳講：「時間mā òaⁿ--ah，咱sòa--lòe來chhōe客店過暝，明á日去港邊chhōe看有船thang載咱去南島--無。」2 ê查埔--ê lóng無其他ê意見，tāi-chì to̍h照án-ne行--落-去。

Hoan-tńg-kang，3人去到港邊，插插插四界lóng是船，有貿易船teh chiūⁿ貨落貨--ê，mā有漁船tng靠岸teh落魚貨--ê，mā有客船tng teh kho͘人客beh出港--ê，kui ê港邊無閒chhì-chhà，m̄-koh講--起-來mā kài怪奇，in 3 ê人kui ê港邊ê船頭家問透透，to̍h是無船beh去南島。A郎thó͘ 1 kháu大氣講：「Aih，nah ē án-ne，chhōe無船是ài án-chóaⁿ去？」A鳳應講：「Mài煩惱--lah，咱koh kâng探聽看māi--leh，凡勢to̍h chhōe有步。」Chit時1 ê tī路邊歇睏nah涼食hun ê a伯出聲kā in hiu：「少年--ê，lín kám是beh去南島？」3 ê人聽--tio̍h真歡喜，緊大步行去a伯hia ka請教。A伯講：「聽講南島最近有大歹人，khah bē平靜，he船頭家lóng無ài去，生理人gâu sǹg，驚冒險，nā萬不二衰siâu，家伙to̍h ài賠了了，lín nā是一定ài去，ē-tàng去瘦猴hia kah伊參詳看māi--leh。」3 ê人歡喜kah，總算是有希望，有機會thang chhōe tio̍h船，趕緊問a伯ài án-chóaⁿ去瘦猴hia。A伯講：「去瘦猴hia ê路彎彎oat-oat，我講有路來lín mā聽無路來--lah，kui-khì我chhōa lín來去。」

【Pe̍h-ōe-jī pán】

3 ê lâng iân-lō͘ khai-káng iân-lō͘ kiâⁿ, A-lông mn̄g kóng: “Thī-ke-ché, khòaⁿ lí chhùi-chhiò-ba̍k-chhiò, sim-chêng bē-bái hōⁿ?” Ìn kóng: “Hèⁿ ā! Hâm lín chò-hóe lú-hêng, kài-sêng koh tńg-khì kàu siàu-liân sî bô-hoân