Profil Radiotelevisiun Svizra Rumantscha (RTR)

El saja in da cifras raquinta Giancarlo Lozza. Ed uschia è il studi d'accounting and finance a l'Universitad da Son Gagl era stà in pass logic. Danunder che quest interess vegn raquinta il surmiran da 41 onns en il Profil.

Logica è era sia via professiunala. Suenter il studi e la lavur sco revisur da quints tar ina gronda firma a Turitg, ha el fatg il pass enavos en il Grischun ch'ha manà el tar la controlla da finanzas dal chantun.

Turnà en Grischun è el tranter auter era per s'engaschar en diversas uniuns. El è president dal Chor viril Surses, cassier da l'Uniun rumantscha da Surmeir ch'edescha la Pagina da Surmeir e commember era d'autras uniuns. Er da quella part da sia vita raquinta el en il Profil.

«La Capriola» gida giuvenils cun in impediment da far in emprendissadi per pudair lavurar en il futur sin il martgà da lavur.

Pli baud era quai giuvenils cun in handicap cognitiv u che duvravan sustegn demprender, di Conrad Cadonau, il manader da «La Capriola» en il «Profil». Uss hajan els per gronda part dentant persunas cun problems psichics.

Ils cas psichics èn fitg interessants. Cura chi va bain cun ils giuvenils pon els far la lavur excellentamain. Grev è, chi po dad in mument a lauter sa midar uschia chi va nagut pli.

Dapi il 2019 viva l'Engiadinaisa cun ina protesa sut il schanugl sanester. Ella lavura sco tessunza tar Movimento, l'instituziun per persunas cun impediments a Samedan.

Dapi sia naschientscha haja il pe da Ladina Cadonau fatg difficultads. Suenter numerusas operaziuns durant 10 onns è ella sa decidida da laschar amputar il 2019 la part sut da sia chomma.

«Avant aveva jau adina dolurs. Era cun far sport u giugar cun mes uffants. Mal, mal, da bunura fin saira e quai durant decennis.»

Grazia a sia tenuta positiva e ferma voluntad, ha Ladina Cadonau puspè cumenzà a lavurar suenter il temp da rehabilitaziun, entant cun ina protesa. Il star en pe tuttadi è però daventà cun il temp memia pesant, uschia che la dunna da 58 onns lavura uss il terz onn tar Movimento a Samedan sco tessunza. En l'instituziun per persunas cun impediments sa senta ella fitg bain.

«Per mai èn ils collavuraturs e las clientas da Movimento simplamain sco ina gronda famiglia, tut è uschè cordial. Insatge ch'ins po ir a tschertgar ditg en auters lieus da lavur.»

Durant sia vita haja ella passentà bels muments, sco per exempel las naschientschas da ses dus figls. Dentant hai era dà temps fitg difficils e pesants, nua che Ladina Cadonau ha era consumà excessivamain alcohol, per supprimer ils problems.

Oz abita la dunna ch'ha passentà sia uffanza a San Murezzan ensemen cun dus giats en ina pitschna abitaziun a Madulain. Il viadi a la lavur daventia adina pli pretensius, causa sia protesa, ma era pervi dals numerus plazzals da construcziun ch'impedeschian adina puspè sia via.

Atgnamain vuless ella raquintar istorgias e crear novs munds – ma betg cun pleds, mabain cun ovras d'art. 

Sco maturanda ha ella scuvert sia passiun per far exposiziuns. Cun ina camera obscura ch'ella sezza ha zambregià è ella ida fotografond tras Cuira. Il punct culminant è però st d'exponer las fotografias.

En il fratemp è Seraina Peer doctoranda d'istorgia d'art a l'Universitad da Berna. Ma ses studi ha manà ella era fin a New York, en China ed en Germania. Ussa ha ella curatà sia emprim'exposiziun dad A fin Z: «Espaces imaginaires» en il Spazi Spescha a Trun. En quest Profil raquinta ella da sia vita per l'art, da surventscher la timiditad e da far ina runda cun ses gravel bike.

Famiglia, plazzas da lavur captivantas ed il mund rumantsch.

Ella è creschida si en la Casa Carigiet a Trun en ina famiglia illustra. Ses augs eran Alois e Zarli Carigiet e ses bab il poet popular Michael Maissen. Grazia al sustegn dal plevon sur Carigiet, er in aug, ha ella pudì far scolaziuns ed ha uschia gì plazzas da lavur captivantas, sco p.ex. en l'Ems-Chemie e l'ultim er en la fabrica da ponn a Trun. Cun ses um, in Jauer, ha ella gì sis uffants en sis onns. Ed insaco ed insacura è ella vegnida en contact cun ils curs da rumantsch en la Casa Caltgera a Laax, nua ch'ella ha emprendì d'enconuscher tranter auter era Pader Flurin Maissen. Ina persuna che haja avert ad ella ils egls per in auter mund. 

Musicist e camiunist – quai è la vita da Dario Hess. La proxima giada sin tribuna è el a l'Indoor Festival a Mustér. Ses ritual avant che sa preschentar davant il public indigen saja da baiver in whisky, era per dumagnar la gnervusitad. A Mustér vegn el a chantar chanzuns da ses nov album Barlot.